Bir har vorte større
1. juni vart 30 tilsette i Indre Hordaland Miljøverk ein del av Bir AS.
Miljøverket, som tidlegare leverte renovasjonstenester i Jondal kommune, er no eit dotterselskap i Bir. Namnet på selskapet er Bir Voss Hardanger.
Samanslåinga tilfører Bir tre nye eigarkommunar: Eidfjord, Ulvik og Voss. I alt leverer selskapet tenester til 381.000 innbyggjarar i ti kommunar, mellom dei Kvam. Det opplyser Bir i ei pressemelding.
Intensjonsavtalen vart signert 26. april i fjor. Ein del av samtalane mellom partane dreia seg om eit felles ynske om å byggja eit biogassanlegg på Voss. Tomta på Bjørkemoen vart kjøpt 16. mai, og planen er å etablera ein «biopark» med anlegget som nav, fortel konsernsjef Borghild Lekve i pressemeldinga.
Styreleiar Stein Kvarekvål i Indre Hordaland Miljøverk meiner samanslåinga er rett og at Bir ikkje vil «sluka», men samarbeida med veslebroren.
