6.000 i Kvam og Jondal får utbyte

I alt deler kontoret i Kvam ut meir enn ti millionar kroner i 2019-utbyte til kundane, etter at generalforsamlinga i konsernet vedtok utbetalinga 24. mars.

– Viktig å stilla opp

I gjennomsnitt vert det betala ut eit utbyte på 3.200 kroner per bustadlån, opplyser banken i ei pressemelding tysdag. Summen er basert på resultatet til banken, storleiken på lån og innskot og kor lenge mottakaren var kunde i fjor. Pengane kjem i løpet av to siste vekene i april.

– For oss er det viktig å stilla opp for regionen og kundane våre i ei krevjande tid. Difor er me særs glade for at me no skal dela banken sitt resultat for 2019 med kundane våre. Me skal strekkja oss langt for at kundane våre skal gå ei så trygg økonomisk framtid som mogleg i møte, seier May Turid Tømmervik, avdelingsbanksjef for Sparebanken Vest i Kvam og Jondal.

Sparebanken Vest er Noregs nest eldste bank, grunnlagt i 1823. Ettersom kundane eig 60 prosent av han, er det naturleg at store delar av overskotet skal koma dei til gode, meiner Tømmervik.

Samfunnsutbyte og fond

Banken deler i tillegg ut samfunnsutbyte på i alt 89 millionar kroner til tiltak i lokalsamfunna og næringslivet på Vestlandet. Tiltaka viser at banken tek samfunnsansvar i ei tid der mange mistar inntekter, meiner avdelingsbanksjefen.

23. mars annonserte Sparebankstiftelsen Sparebanken Vest opprettinga av eit ekstraordinært fond som skal støtta lag og foreiningar på Vestlandet som vil gå glipp av inntekter på grunn av koronaepidemien. Ei rekkje søknader er mottekne. Tildelingane skjer fortløpande.

– Midlane skal gå til organisasjonar som bidreg til gode, inkluderande lokalmiljø for born og unge. Eg håpar at lag og foreiningar i Kvam og Jondal som har opplevd bortfall av inntekter eller har fått auka kostnader som følgje av situasjonen, søkjer fondet om støtte, seier Tømmervik.