Ikkje bygg ned delar av Akkjerhaugen!

– Politikarane vart førte bak ljoset, meiner Bård, Olaug og Trygve Kråkevik.

Takk, Gunvor Bringeland, for du kveikte debatten om Akkjerhaugen i sist HF.

I dag er fristen for å senda inn innspel til reguleringsarbeidet av Akkjerhaugen. Dei skal sendast til Ard arealplan as, Nygårdsgaten 114, 5008 Bergen. Eller på e-post til post@ardarealplan.no. Send gjerne kopi til post@jondal.kommune.no. Ein skulle tru at innspel sende i løpet av helga vert tekne med i prosessen. Brev som vert postlagde utpå dagen i dag, kjem seg ikkje av garde med postbilen før på måndag. Det er lett at mange ikkje har fått med seg dette, særleg når heradet legg dette berre under kunngjeringar på nettsida si, og ikkje også på nyhendesida. På kunngjeringssida står ein liten tekst og der ligg to dokument, men ingen av desse viser med kart eller foto tydeleg kva område av haugen utbyggjaren ynskjer å ta bort frå friområdet. Ein kan klikka seg vidare til ”arkivsak”, men då kjem det opp så mange dokument at det trengst lang tid for å finna ut kva som er kva. Mest synest me politikarane vart førte bak ljoset då me las saksframlegget til plan- og driftsutvalet 22. januar i år. Der skulle utvalet vurdera om det var rett å vedta at det skulle lagast ny reguleringsplan for Akkjerhaugen, på bakgrunn av at utbyggjaren har søkt heradet om dette. Kvifor gjorde ikkje administrasjonen det klårare for politikarane kva som stod på spel dersom dei sa ja til dette? Klårare informasjon kunne i alle fall fått utvalet til å vedta nokre retningsliner som burde takast omsyn til ved utarbeiding av ny reguleringsplan for sjølve friområdet. I sakspapira til utvalet er det berre ei fotoskisse inni sjølve søknaden frå utbyggjaren, eit vedlegg i saka, som gjev ei viss formeining om kva del av haugen som kan gå med til bygget. Utvalet sa samrøystes ja. Me kjenner ikkje til at det her kom spørsmål om kva som då kunne forsvinna av Akkjerhaugen.

Kva kan forsvinna av Akkjerhaugen no?

Akkjerhaugen er einaste friområdet midt i Jondal sentrum. Her er ein gamal gravhaug og her står bautasteinen. Vakrare stad å sitja og skoda over bygda og fjorden vår på finst ikkje. Du finn nokre fine ting å lesa viss du søkjer på Akkjerhaugen på heradet sine nettsider. Reguleringsplanen for området som heradet lagde i 1996, skulle sikra haugen for framtida. Når ein står oppe ved bautasteinen og ser mot fjorden, ligg det ein liten dal framfor ein. Mellom dalen og fjorden finst det ein mindre haug med to større furuer på, som naturleg avgrensar friområdet frå næringsområdet framanfor og den gamle motorverkstaden til Trygve Røed nede ved fjorden. I tillegg skjermar i dag andre tre nærare bautasteinen innsikta til hotellet som no byggjest. Den noverande reguleringsplanen har vore klokt laga, og vernar dette området framanfor toppen av Akkjerhaugen, slik at folk som er der, opplever sjølve Akkjerhaugen som eit retteleg friområde. Av det me kan sjå av planane til utbyggjaren, ynskjer han å byggja eit slags glasbygg forma som ein brearm gjennom delar av denne haugen og heilt opp i dalen rett under stupet framfor bautasteinen. Dette vil sjølvsagt endra opplevinga av Akkjerhaugen vesentleg. Området ved og bak den gamle motorverkstaden er ikkje lite, og størstedelen av dette er i dag regulert til næring. Det finst endeleg brearmar som er meir breie og ikkje så lange som kan inspirera arkitekten til eit anna type bygg, som ikkje skjer seg inn i Akkjerhaugen. Ny reguleringsplan kan då heller korrigera grensene til næringsområdet litt mot sør og litt mot aust inn mot denne haugen framfor Akkjerhaugen, noko som med utskyting av massar kunne gje plass til eit bygg, føresett at det ikkje kjem i siktlina frå Kattanes, Jondal sentrum og bautasteinen på Akkjerhaugen!

Engasjer Dykk!

No vil me at folk skriv til Ard as som lagar reguleringsplanen og til kommunen at det er utelukka å byggja ned nærområdet rett framfor Akkjerhaugen: Lat det enno vera mogleg å oppleva Akkjerhaugen med dalen og haugen framanfor og trea som naturleg stengsle mot innsikt til noverande hotellbygg og komande kulturhus og bresenter med meir.

Når ein kjem i hug at Jondal no ikkje lenger får vera den einaste hardangerbygda utan slike «moderne» kassar med glas på mot fjorden, og at området som fell naturleg som park ned mot stranda for dei gamle i den elles på alle sider innebygde Vikevollen, no har fått ein vegg av eit bygg stengjande mot fjordutsikta, vert det så altfor viktig å ta vare på Akkjerhaugen slik han er i dag. Med forsiktig tilrettelegging og litt hogst kan dei gamle få tilkomst til dalen framfor Akkjerhaugen og utsikta der mot fjorden og jondalsbygda. Så vidt me veit, fekk ein slektning av tidlegare eigar av denne tomta i dalen her nei frå heradet då han ynskte byggja bustadhus her, sidan tomta var vedteken som friområde. Elles er det mange som undrast på kvifor ikkje hotellbygget kunne lege lenger ned mot stranda, eller som eit sjøhusaktig hotell ved fjorden? Me veit at utbyggjaren òg hadde syn for byggja noko i tradisjonell stil, men heradet signaliserte visstnok i dialogen med han at det «passte seg ikkje i vår tid». Lukke til med kampen om Akkjerhaugen!

Bård, Olaug og Trygve Kråkevik