Gode kvemmingar! Velkomne til nytt skule– og barnehageår!

Det har vore ein flott sommar. Håpar mange av dykk har kunna nyta sommaren og fått eit avbrekk frå kvardagen med påfyll av ny energi. Hausten nærmar seg, og med det er det oppstart på nytt skule- og barnehageår. Eg vil nytta høvet til å ynskja born og foreldre velkomen til eit nytt og spanande år. Skule og barnehage gler seg til oppstart. Personalet har førebudd seg godt til eit nytt og spanande år for borna. Spesielt velkomen til 1.-klasseborn og -foreldre.

I samband med skulestart er born og unge tilbake på skulevegen. Me har alle eit ansvar for å gjera skulevegen så trygg som mogeleg for borna våre. Så eg vil oppfordra alle til å ta ekstra omsyn når de ferdast langs vegane. Me har i seinare tid teke i bruk nye gang- og sykkelvegar sentralt i kommunen som gjer skulevegen tryggare for mange. Eg oppfordrar så mange som mogeleg til å nytta sykkel og gå til og frå skulen, slik at «foreldrekøyring» vert redusert til eit minimum. Foreldrekøyring er med på å gjera skulevegen mindre trygg, då det aukar biltrafikken rundt skulane monaleg. Me ynskjer difor minst mogeleg bilkøyring rundt skulane våre i skuletida. Foreldre må gjerne gå eller sykla i lag med ungane den fyrste tida, slik at borna vert trygge på skulevegen og kan ferdast trygt til og frå skulen aleine.

Med ynske om ein trygg skule -og barnehagekvardag for alle.

Jostein Ljones,

ordførar