– Fjordane våre skrik etter modige politikarar

– Vestlendingar – sjå til Tromsø! skriv Mona Høgli (MDG).

Tromsø kommune har nettopp gjort eit historisk vedtak: Kommunen skal ikkje tillate fleire oppdrettskonsesjonar, og dei eksisterande konsesjonane skal ikkje forlengast utan at dei blir drivne i lukka anlegg. Det har ingen norsk kommune gjort tidlegare.

Vestlendingar og nordlendingar har historisk sett hatt mykje til felles når det gjeld fisk. La oss slå oss saman med tromsøværingane i denne saka. Fjordane våre skrik etter modige politikarar som torer å ta kampen opp mot laksebaronane og forureininga frå anlegga deira.

Oppdrettsnæringa i Noreg dumpar tonnevis av kjemikalier i form av lusegift rett i fjordane våre. Kloakken frå merdane, som utgjer like mykje som avfallet frå 20 millionar menneske, går rett i sjøen. Villfisken er full av pellets, rekefelta tømmest. Inne i merdene står det ikkje stort betre til: Fisk som blir sjuke, fisk som rømmer, fisk som dør. Ja, heile 7,7 millionar laks kom seg ut av merdene og slo seg i lag med villfisk i 2017. Fjordane lir, oppdrettslaksen lir, villfisken lir. Vi kan ikkje ha det slik at ei næring får øydelegge fjordane våre og den viktige og fantastiske naturen vi finn der.

Det var Miljøpartiet Dei Grøne som sette fram forslaget om å få lukka oppdrettsanlegg inn i klima- og miljøplanen for Tromsø. Og dei fekk fleirtalet med seg. Det er eit kraftig signal til oppdrettsnæringa om at dei må endre kursen. Kva med å vise at vestlendingane er like modige og framtidsretta som dei i nord?

Mona Høgli,

Miljøpartiet Dei Grøne