Ein stor takk til Sandven FUS barnehage

For nokre veker sidan hadde yngstejenta siste barnehagedagen sin, som den siste i ein syskenflokk på fire som har gått i Sandven FUS barnehage. Me har vore med frå starten i august 2009, og har hatt to, tre, to, tre, to og no til slutt eitt barn i Sandven FUS barnehage. Alle fire har hatt innhaldsrike, spanande og lærerike dagar i barnehagen, og «eg vil ikkje heim, det er så kjekt å vera her», har vore ein gjengangar ved hentetid. Me har opplevd eit positivt, kompetent, engasjert og interessert personale som har sett kvart enkelt av borna våre, støtta, oppmuntra og trøysta, men også rettleidd og tatt tak i ymse situasjonar når det har vore naudsynt.

Innhaldet i barnehagedagane har vore mangslunge. Me er glade for at aktivitetane som regel har vore i nokså små og oversiktlege grupper der borna har kjent seg trygge og det alltid har vore nok vaksne til å følgja dei opp. Nokre få døme kan vera:

• Fokus på sunn mat, der borna sjølve får vera med både på å dyrka og laga mat. Det har m.a. resultert i at eine 4-åringen vår kom heim og annonserte at han no likte salat, for han hadde hausta og smakt på salaten han dyrka i barnehagen, og den var god. Ein annan gong vakna yngstejenta til då ordet «snøkrabbe» dukka opp i ein samtale. «Snøkrabben lever på botnen. Eg har smaka snøkrabbe i barnehagen», kom det då. I «prosjekt lam» byrja dei med å partera lammet og brukte så alle delane av det, m.a. til å laga lammekjøttbollar og rullepølse heilt frå botnen.

• Kreativitet er eitt av slagorda til barnehagen og har gitt seg uttrykk på mange ulike måtar. Kreative kunstprosjekt er ein av dei, og kreative måtar å gjenbruka og resirkulera på er ein annan. Song, musikk og dans har vore sentralt, og spanande utflukter til teaterframsyningar, konsertar og kunstutstillingar har gjeve borna kunnskap og gode minne.

• Tur- og friluftsdagar i vogn, til fots, på ski og på sykkel, alt etter alder og årstid. Nærområdet i Orrehaugen og Sandvenlia vert flittig brukt, men av og til har turen gått lenger, t.d. til Sjusete og Vikøy.

• Språksprell, med fokus på språkutvikling. Våre born har hatt stor glede av rima og reglene dei har lært i Språksprell-øktene.

• Vennskap har stått sentralt, og barnehagen arbeider mykje med det sosiale. Alle våre fire har hatt og har gode barnehagevener som dei har byrja på skulen saman med. Samtalar kring korleis me skal vera mot kvarandre har vore nyttige for alle våre fire born, og har skapt eit godt grunnlag for livet på skulen.

• Nærmiljødagar er temadagar der borna får læra å kjenna bygda si betre. Barnehagen har også i fleire år samarbeidd med Toloheimen, der ulike mindre grupper har fått vera saman med bebuarane gjennom prosjekta «Generasjonssong» og «Livsglede for eldre».

• Vekeord er ord knytte til eit tema som ein snakkar om i samlingsstunda gjennom ei heil veke. Dette har vore lærerike stunder der borna våre har lært om alt frå førstehjelp til vinterfuglar til kjensler til samiske og nepalske ord.

Me rettar med dette ein stor takk til personalet i Sandven FUS barnehage for å ha bidratt til å gi borna vore nokre innhaldsrike, sunne, spanande og lærerike førskuleår fulle av kvardagsmagi.

Angel og Synnøve Rosales