Vonar festival vert euforisk

Ida Sørheim er festivalsjef for sjette gong. Ho arbeider med arrangementet heile året. I fjor vart Sørheim tilsett i Bygdalarm med ei 40 prosent stilling.

– Dette er draumejobben! Eg kosar meg veldig, og håpar eg kan driva med dette i lang tid, seier ho.

Ifølgje henne er arbeidet intenst når det står på — slik som denne veka. Sørheim held i trådane og har ansvar for litt av kvart. Billettar, leverandørar, søknadar og rapportering. Arbeidsoppgåvene handlar mykje om planlegging og organisering. Saman med resten av styret til Bygdalarm, får Sørheim ting til å skje.

– Ein må ha alt på stell. Det har kome fleire krav til festivalar dei siste åra, fortel Sørheim.

Testar nye tilbod

Nytt av året er tilbodet om Bygdacruise om bord på MS «Epos». På laurdag kan ein få seg ein båttur og lada opp til konsert. Sørheim har jobba på «Epos» tidlegare, og er god veninne med Maria Pile Svåsand, som driv båten. Turen er eit samarbeidsprosjekt mellom Bygdalarm og «Epos».

– Me har vore innom tanken på å ha båttur tidlegare, men det har ikkje late seg gjera. No kan me endeleg testa det, så eg håpar det vert bra, fortel Sørheim.

Lokasjonen til ein av «klubbane» er også ny i år. I fjor enda klubben opp på den gamle brannstasjonen etter mykje fram og tilbake. Det vart suksess, men no er bygget vekke. Det er såpass mange som kjem på klubb at det vert for liten plass på Straumen. Difor skal også ein tredel av idrettshallen i Norheimsund nyttast. Rommet skal innreiast med lys, laserar og røykmaskin.

– Eg veit ikkje om det er ei varig løysing, men me prøver å bruka hallen i år, seier Sørheim.

Bra sal

Billettsalet går betre enn i fjor.

– Me sel billettar kvar dag no. Det er kjekt om det vert utseld, seier Sørheim.

Ho fortel at mange kjøper i siste liten. Slik har trenden vore dei siste åra, spesielt etter koronapandemien. Sørheim trur den usikre mentaliteten heng litt att. I tillegg er det andre faktorar som spelar inn: Sommarplanar, artistar og vêr.

– Vêrmeldinga går litt opp og ned. Eg stolar ikkje på meldingane før det skjer, fortel Sørheim.

Ifølgje henne er overskya det beste festivalvêret. Sørheim er nøgd så lenge det ikkje høljeregnar under rigginga. Regn eller ikkje — Bygdalarm vert det uansett.

– Folk må berre kle seg fornuftig. Eg skulle gjerne ha styrt vêret, men det går dessverre ikkje, seier Sørheim.

Tufta på dugnad

Dugnad og fellesskap er viktig for Bygdalarm. Om lag 280 frivillige står på for å laga til festivalen. Ifølgje Sørheim treng ein dugnadsarbeid om det skal skje noko.

– Det er kjekt at folk får augo opp for dugnad — det er det Bygdalarm er tufta på, seier ho.

I år har det ikkje vore noko problem å få tak i nok folk. Sørheim tykkjer det er fint at ein kan laga noko saman. Ho elskar å vera på festival. Både stemninga, musikken og folka.

– Eg håpar årets Bygdalarm vert euforisk! seier ho.

Artistpuslespel

Bookingstyret til Bygdalarm er allereie i gang med å finna artistar til neste års festival. Ifølgje Sørheim er det ikkje berre berre å få tak i dei ein vil ha.

– Det er eit stort puslespel. Me må tenkja på økonomi, publikum sine ynskjer og om artistane er tilgjengelege, fortel ho.

Målet er å ha artistar som både ungdom og vaksne likar å høyra på. Sørheim er nøgd med programmet for i år. Hovudsjangeren er pop, men ein finn også rock, country og elektronika.

– Me ynskjer å ha noko for alle, seier Sørheim.