Vinterfestinnspurten er i gang

«Barbie blir Bygdis» er tittelen på årets framsyning. For at så mange som mogleg skal få prøva seg på scenen, er fleire av dei største rollene delte mellom fleire elevar. Hovudkarakteren Barbie vert til dømes spela av tre skodespelarar. To av dei er Madelene Johanne Botnen og Celina Huun. Dei trur ikkje det at fleire spelar same karakter, vil forvirra publikum.

– Nei, karakterane har på seg kostyme som gjer dei er lette å kjenna att. Det er ikkje eingong sikkert at publikum merkar at det er fleire skodespelarar, seier Madelene.

Barbie til Kvam

Framsyninga er inspirert av filmane «Barbie» og «Mamma Mia». Den handlar om at Barbie må flytta frå USA til ein slektning på Børvenes.

– Kvam og USA er ganske ulike stader, og framsyninga handlar om Barbie sitt møte med Kvam og kvemmingane, fortel Madelene.

Elevane vil ikkje røpa meir om handlinga, men fortel at det vert både romantikk og mykje Abba-musikk.

– Det at me kombinerer Barbie med Abba, gjev meining når folk ser framsyninga, men me røper for mykje om me forklarar samanhengen no, fortel Celina.

Med så mange songar trengst eit skikkeleg orkester. Tormod Kristian McCorkle er ein av musikarane. Han skal spela både saksofon og gitar.

– Sjølv om det er sju–åtte songar, er ikkje dette ein musikal. Framsyninga har mest skodespel, fortel han.

– Mykje arbeid

Arbeidet med vinterfesten byrja tidleg i haust. Det meste av hausten har elevane jobba tre timar i veka med framsyninga. Mykje av tida har grupper med ulike ansvarsområde jobba kvar for seg. Først like før jul fann gruppene saman og byrja snikra delane saman til ei framsyning. Den siste veka før framsyninga står knapt anna på programmet.

Høgskulelektor i drama, Kirsti Aksnes, er henta inn for å hjelpa elevane. Då HF vitja øvinga torsdag 4. januar, var ho instruktør.

Ho var i Øystese i haust òg, for å førebu elevane som skal på scenen.

– Me øvde mellom anna på korleis me skal by på oss sjølve og på korleis ein skal bruka stemma, fortel Celina.

– Gjev meistringskjensle

– Kva anna har de lært?

– Eg tykkjer det er imponerande at me i 10. klasse klarar å laga ei så stor framsyning. Det syner at me kan få til det meste om me berre vil, seier Celina.

– Me må samarbeida for å klara dette. Eg meiner me har vorte flinkare til å samarbeida, seier Madelene.

Ei veke før premieren synest elevane dei er i rute.

– Det er mykje me allereie har fått til, seier Tormod.

– Men det er framleis litt me må øva på, seier Madelene.

– Me må berre fletta alt saman slik at framsyninga får ein god flyt, seier Celina.

– Korleis er magekjensla?

– Eg grugler meg, og er spent på korleis det går, seier Celina.

– Det vert spanande. Eg håpar det vert kjekt, seier Madelene.

– Veks med oppgåva

Kari Torpe er avdelingsleiar på 10. trinn. Ho er med på å laga vinterfest for første gong.

– Dei andre lærarane seier at me ligg godt an, så då trur eg på det. Det har vore kjekt å sjå korleis elevane har vakse med oppgåvene. Dei byrja famlande og usikre, men etter kvart byrja dei å ta meir og meir ansvar, seier ho.

Eit av måla med vinterfesten er å skapa betre samhald mellom elevane.

– Dei får sjå nye sider hos kvarandre, og dei får gjera noko kjekt saman. Me håpar det skapar minne dei hugsar når dei tenkjer attende på skuletida, seier Torpe.

Ho håpar også arbeidet med framsyninga skal læra elevane å sleppa seg laus.

– Unge i dag er veldig redde for å gjera feil. Når dei vågar å øva og framføra noko slikt, håpar eg dei lærer å slappa meir av, seier Torpe.

«Barbie blir Bygdis» har premierer fredag 12. januar i idrettshallen i Øystese. Premieren er berre for inviterte gjester. Laurdag vert det ei framsyning for alle.