Gustav Korshavn Vikesdal svingar Tuva Bystøl Børve i ei scene frå ungdomsskulen.

Vinterfest hausta skryt frå mange hald

– Eg synest me var modige, seier elev og skodespelar Storm Aalvik Rosseland (15) etter årets vinterfest i regi av 10. klasse.

Journalist
Publisert Sist oppdatert

I år hadde avgangselevane ved Kvam ungdomsskule gjort nær sagt alt med vinterfesten sjølve. Dei hadde tenkt ut idear og tema, skrive manus og laga kostyma. Showet vart kalla «Rundt neste sving».

Song, musikk og dans var viktige element. Mange bidrog med song. Frå venstre: Lisbeth M. Lingener, Jenny Gjerdevik. Abdulsamad Mohamed Saalah, Isak Valland Lyngset og Julian Norheim Haukaas.

Ulike epokar

Showet handla om ei tidsreise. I fyrste scene var dei sentrale rollefigurane på ein gamleheim i Øystese i framtida, nærare bestemt i år 2125. Deretter reiste dei til ulike tidsaldrar og stader med hjelp av ei tidsmaskin. I tidsaldrane møtte dei ei rekkje nye figurar og utfordringar.

Frå venstre: Gamlingar spelte av Gustav Korshavn Vikesdal, Eline Fosso, Sial Rafat Slojek og Lisbeth M. Lingener reiste frå gamleheimen med tidsmaskin.

Tidsmaskina tok karakterane tilbake til eiga skuletid på Kvam ungdomsskule, westerntida, planeten Mars, år 1980 og vikingtida. Til sist fann dei vegen tilbake dit dei trivst best, på gamleheimen, der to av bebuarane med eit kyss vart samde om å dela dei siste åra med einannan.

På planeten Mars dukka ikkje berre romvesen, men også andre underlege vesen opp. Mellom dei var radarparet Donald Trump og Elon Musk.

– We are going to make Mars great again, sa Aleksander Aase Børven i rolla som Donald Trump.

Frå venstre: Aleksander Aase Børven og Jakob Aarekol Botnen i rollene som sjølvaste Donald Trump og Elon Musk.

Då karakterane frå gamleheimen kom til Mars, oppstod ein tvist om kven som var fyrst på planeten.

– Me kan jo kjøpa oss ut av situasjonen, sa Elon Musk, gestalta av Jakob Aarekol Botnen.

Sanne Mo (t.v.) og Amanda Mo spela romvesen på Mars. Her med «romfararar» i kvitt: Vilde Eide Skeie (t.v.), Isak Valland Lyngset og Tuva Bystøl Børve.

Fleire element i sving

Framsyninga rommar eit mangfald av sketsjar og kreativitet. Skodespelarane viste evner innan dans, turn, song og skodespel, og fleire av elevane spelte fleire roller. Mange fekk prøva seg som songarar, både som solistar og i grupper.

Ei av fleire livlege dansescener. Her feirar lærarar på Kvam ungdomsskule at dei har teke mange elevar på fersken utan «butikklapp».

Også dei atletiske sidene til elevane kom fram, særleg i dansar som inneheldt turnelement. «Husbandet», sett saman av elevar og lærarar, sørgde for musikk til det heile.

Elevane bak scena jobba med marknadsføring, teknologi, scenearbeid og sminke. Rekvisittane hadde elevane i «crewet» laga sjølve av treverk og ymse andre materiale. Til dømes økser, hestar, sverd, skjold, kapper, vikingskip og vikinghjelmar gav liv til scenene.

Frå venstre: Kvartetten Jenny Gjerdevik, Kristina Sangolt Eikeland, Lisbeth Mariechen Lingener og Sial Rafat Slojek song i scena frå vikingtida.

Skryt frå alle kantar

– Det var bra, ikkje sant? kviskra konstituert rektor ved Kvam ungdomsskule, Elisabet Aarekol, til HF før ho gjekk opp på scena.

På scena skrytte ho av elevane sitt arbeid. Ho framheva at det var kjekt å sjå alle elevane i sving.

– Heile trinnet er med på det som de ser i dag. Det er veldig kjekt, sa Aarekol.

Alle elevane fekk koma på scena og ta imot applausen etter framsyninga.

Prominente gjester som leiar for skule i Kvam herad, Inga Lill Jensen Tolo, og ordførar Torgeir Næss forlét VIP-bordet og gjekk på scena etter framsyninga. Tolo sa at ho var veldig imponert over det ho fekk sjå. Ho oppmoda lærarane om å halda fram med arbeidsmåtane i arbeidet med vinterfesten.

– Me treng fleire høgdepunkt som dette, sa skuletoppen.

Årets vinterfest baud på ei reise gjennom fleire epokar. Her ser me Abdulsamad Mohamed Saalah i rolla som viking.

Ordføraren var særs imponert av det han såg frå elevane. Han var full av lovord.

– Eg er så stolt. Dette er noko av det beste eg har sett, sa Næss.

Ordføraren trekte særleg fram at skulen makta å stilla med musikk frå eige band. Nærast sit Eirin Laupsa.

Lærar Hilde Bjørke på 10. trinn smilte frå øyre til øyre etter den lukka framsyninga for foreldra til ungdomsskuleelevane fredag kveld. Ho fortel at jobbinga med vinterfesten har vore gjevande.

– Dette er nok mitt karrierehøgdepunkt, seier Bjørke.

Rundt 550 personar såg framsyninga fredag, opplyser rektor Aarekol. Laurdag hadde elevane si andre framsyning, denne gongen for alle som ville sjå henne. Truleg kom om lag lik mange då som fredag.

Foreldra til 10.-klassingane song i kor til borna sine etter at framsyninga var ferdig. Nancy Karine Sangolt hadde skrive tekst til ein melodi frå Gunslingers. Også fleire videoar med foreldre og lærarar, og ei videohelsing til elevane frå Bjarte Hjelmeland, vart viste fredag.

– Solid framføring

Storm Aalvik Rosseland (15) og Oliver Flagtvedt (15) var mellom elevane som stod på scena. Dei hadde roller som cowboyar i scena frå westerntida, der Ennio Morricone-melodien frå «The good, the bad and the ugly» sette stemninga frå start.

– Korleis synest de framsyninga var?

– Ganske solid, seier Flagtvedt.

Rosseland er samd.

– Eg er stolt over dei andre elevane i klassen. Me har vore modige. Eg har kjent i magen at dette er ekkelt, men det var kjekt, fortel Rosseland.

Storm Aalvik Rosseland (t.v.) er imponert over alle som torde å gå på scena. Her med Gustav Korshavn Vikesdal i westernscena

– Korleis har de kome på alle ideane til framsyninga?

– Mykje tenking og skriving. Alle har halde på med idear og vore med, fortel Rosseland.

– Korleis var det å vera på scena framføre eit stort publikum?

I lærarscena fekk ein elev spelt av Kristina Sangolt Eikeland eit svært tydeleg og tungt løyve til å gå i sentrum i skuletida – ein såkalla butikklapp. Bak ser me Sanne Mo og Åsa Aalvik.

– Det var litt ekkelt, men det gjekk fint, seier Flagtvedt.

– Ein lyt berre «svelgja det». Eg hadde ein stein i halsen. Men det var kjekt, seier Rosseland.

Du kan sjå fleire bilete frå framsyninga her:

Ingen tvil. Det var pynta til fest i Øystese idrettshall fredag kveld.
Frå venstre: Gustav Korshavn Vikesdal, Eline Fosso, Sial Rafat Slojek og Lisbeth M. Lingener reiste med tidsmaskin frå gamleheimen.
Sohaila Vahidi (t.v.) og Kristina Sangolt Eikeland spelte robotar på sjukeheimen i 2125. Dei serverte energidrikk og ADHD-medisin.
Frå venstre: Lukas Hoff, Julian Norheim Haukaas og Quoc Huy Tran les HF på gamleheimen.
Frå venstre: Abdulsamad Mohamed Saalah, Isak Valland Lyngset og Julian Norheim Haukaas medverka i fleire songinnslag.
Frå venstre: Even Froestad Gjerde og Julian Norheim Haukaas song.
Gruppedans til «Forever Young». Nærast står Lærke Aarestad Fykse.
Jakob Aarekol Botnen spela svært streng ungdomsskulelærar og spratt fram frå den kamuflerte gøymestaden med våpen i hand.
Jakob Aarekol Botnen i rolla som den uvanleg strenge læraren Bork.
Mange fekk prøva seg framme på scena fredag. Her frå eit songinnslag i flokk.
Frå venstre: Kristina Sangolt Eikeland, Even Froestad Gjerde og Åsa Aalvik som ungdomsskuleelevar i 2025.
Lærargjengen feirar at dei tek mange elevar for ulovlege butikkturar.
Lærardans for å feira dei mange elevane ein av lærarane har teke på fersken utan butikklapp.
Linea Pettersson Gjerde som ungdomsskulelærar Jens Thomas.
Tuva Bystøl Børve (t.h.) fekk salen til å skratta då ho imiterte ein lærar med trønderdialekt, Mina, som nekta å gje ein elev (Åsa Aalvik) løyve til å gå på butikken
Det var vist ei rekkje dansar. Her frå «linedance» i westernscena.
Quoc Huy Tran (t.v.) og Gustav Korshavn Vikesdal song til linedance.
Fotografen sikta seg inn på cowboyane. Dei sikta attende.
Cowboy Hans Rykkje (t.v.) tok utfordringa til revolverduell frå ein annan cowboy, Gustav Korshavn Vikesdal. Sistnemnde vann.
Tuva Bystøl Børve song «Rocket Man» med innleving i scena frå Mars.
Gustav Korshavn Vikesdal med ein genserklassikar frå slutten av førre tusenår. Her med Abdulsamad Mohamed Saalah og Sanne Mo.
Silvia Skeie-Rubio (t.v.) og Vienna Fosse Vik svingar seg til 80-talstonar.
Framsyninga romma mykje dans. Her ei dansescene frå 1980. Fremst står Sanne Mo og Isak Valland Lyngset.
Isak Valland Lyngset trykkjer ein av kodane til tidsmaskina. Dei trongst for å koma seg vekk frå 1980.
Vikingar med sverd, skjold og hjelmar.
Tuva Bystøl som vikingkvinne i scena frå vikingtida.
Tuva Bystøl Børve som vikingkone.
Gruppedans i vikingscena, med Jenny Gjerdevik lengst framme.
Damene gjekk av med sigeren i sketsjen frå vikingtida.
Sondre Fagerheim Lunestad (t.v.) i bandet spelte fløyte i fleire innslag.
Husbandet fekk ros. Nærast sit Eirin Laupsa.
Framsyninga vart runda av med «Bare så du vett det».
Alle elevane som medverka til framsyninga, fekk koma på scena og få hyllest.
Alle elevane som medverka til framsyninga, fekk koma på scena og få hyllest.
Alle fekk ståande trampeklapp då framsyninga var ferdig laurdag. Levi-Mathias Unsgaard var konferansier og gav takk til dei som takkast skulle.
Lærarane på Kvam ungdomsskule vart takka for innsatsen.
Også dei ansvarlege for marknadsføring fekk applaus.
Også alle dei som ikkje var scena, men fekk maskineriet til å gli på andre måtar, fekk litt ekstra merksemd etter framsyninga.
Elisabet Aarekol framheva innsatsen til fleire. Ho takka lærarane for stor fleksibilitet i arbeidet med vinterfesten.
Skulesjef Inga Lill Jensen Tolo gav elevane tommel opp for innsatsen.
Rektor Elisabet Aarekol var nøgd med det ho fekk sjå frå fyrste rad.
Fredag var det framsyning for foreldra. Laurdag kunne kven som helst koma og sjå. Mange nytta sjansen.
Ordførar Torgeir Næss framheva at alle på og bak scena har gjort ein god jobb. Særleg trekte han fram at elevar og tilsette i bandet leverte ekte musikk.

HF gjer merksam på at redaktør Sigbjørn Linga i HF er forelder til ein av 10.-klassingane og hadde ei rolle i arrangementet. Han har teke ein del av bileta som er nytta i denne artikkelen. Red.

dans musikk kvam ungdomsskule øystese kvam herad kultur og underhaldning kultur foto og film utdanning teater scenekunst underhaldning
Laga med Labrador CMS