– Det er ei enorm anerkjenning av forfattarskapen til Fosse. Det at han skriv på nynorsk, gjer meg som vestlending enormt stolt, sa statsråd Lubna Jaffery til årsmøteforsamlinga.

– Vil vera unaturleg med annan stad

Kultur- og likestillingsminister Lubna Jaffery (Ap) lovar ikkje stort, men ser med velvilje på planane om eit Fosse-senter i Kvam.

Sigbjørn Linga
Bladstyrar
Publisert

Gaza, Ukraina, dyrtid, arbeid til alle, det nedslåande valresultatet og kampen for å gjenreisa Ap.

Jaffery var innom mangt og mykje, og heldt seg til dei store linene før ho pensa inn på kultur og etter kvart spesifikt på det uavvendelege temaet Jon Fosse, då ho tok turen frå Bergen og kasta glans over årsmøtet til Kvam Ap sundag ettermiddag.

Ikkje heilt overraskande var det Arnhild Litleré, lokalpolitikar og engasjert i Fosse-Stiftinga, som peika på elefanten i rommet då ho etterlyste kva tankar statsråden gjer seg om pristildelinga til sambygdingen.

Om lag eit dusin møtte fram til årsmøtet, som var ope for ålmenta og kunngjort.

– Ting tek tid

I oktober vart det kjent at Fosse vart tildelt Nobelprisen. 10. desember fekk han provet i Stockholm. Allereie då var samtalane om markeringar av forfattaren godt i gang. Fosse-Stiftinga og lokale krefter arbeider for å reisa eit Fosse-senter på den gamle skuletomta på Tangerås. Spørsmålet er i kva grad staten vil bidra.

Det kan ikkje statsråden svara konkret på enno. Debatten omtalar ho som litt prematur. Det ho kan seia, er at det vil vera unaturleg om eit senter vert liggjande ein annan stad enn i Strandebarm. Dessutan manar ho til å gjera lokale vedtak om støtte til prosjektet.

Statsråd Lubna Jaffery mana partifellane til å stå på for å sikra Ap eit betre resultat ved neste val. Kampen for å overtyda folk om at Ap har den beste politikken, må kjempast heile tida, understreka ho.

– Eg veit det er mange planar i Kvam. Det må me snakka om saman. Kvar Jon Fosse kjem frå, må få ein plass i dette biletet, men me koma tilbake til planane. Ting tek tid, seier ho.

Ho meiner det er viktig at ein vert samd lokalt om kvar og kva form eit eventuelt senter skal ha. Så gjeld det å laga eit vidare løp som er berekraftig.

– Eg har tenkt å vera med og bidra til dette på eit eller anna vis, men me må koma tilbake til korleis det vert, seier Jaffery.

Arnhild Litleré og mobiltelefonen er ikkje perlevener, men «selfie» med henne og statsråden vart det orden på. Lubna Jaffery vart nemleg litt «starstruck» då ho såg «Side om side»-skodespelaren i rommet. Frå venstre: Eusebiu Amanalachioai, Even Øyri, Jaffery, Dag Rune Mo, Karin Mo Valland, Gunnar Skeie, Litleré, Eilen Rykkje og Linda Haugland Jondahl (bak).

Andre tiltak

Ho fortalde at Nasjonalbiblioteket digitaliserer arkivet til Fosse, og at det vert ei årleg Fosse-førelesing med ein invitert førelesar. Dessutan har regjeringa oppretta eit stipend på ein halv million kroner som går til nokon som omset norsk litteratur til andre språk.

Jaffery understreka at det er viktig for regjeringa at tiltaka er i tråd med det forfattaren sjølv ynskjer.

Statsråden skal denne veka ha eit møte med ordførar Torgeir Næss i Kvam og fylkesvaraordførar Stian Opedal Davies for å drøfta mellom anna korleis pristildelinga kan fylgjast opp.

– Det er mange aktørar på banen og mange som vil trykkja Fosse til sitt bryst og ha eigarskap til Nobelprisen. Eg vil snakka med ordføraren fyrst for å få litt oversikt. Så vil eg møta alle som vil snakka om korleis me kan heidra Fosse, Strandebarm og kommunen, men me må gjera det i rett rekkjefylgje. Og så må Fosse få vera involvert. Eg forstår at det er eit stort ynske om å heidra staden han kjem frå, seier Jaffery.

fosse-stiftinga kvam herad kultur og underhaldning kultur politikk jon fosse litteratur norheimsund
Laga med Labrador CMS