Vil syna fram dialektane og bygda

Bak festivalen står Folkeakademiet Kvam, Fosse-stiftinga, Kvam Mållag og Kvam herad. Randi Jåstad er leiar i Kvam Mållag og medlem i festivalnemnda. Ho fortel at festivalen inneheld aktivitetar både for born, ungdom og vaksne. Trass i at språket spelar ei viktig rolle på festivalen, er det ikkje ein festival berre for norsklærarar.

– Dette er eit arrangement for folk flest. Ein treng ikkje vera over gjennomsnittleg interessert i språk for å finna noko spanande på festivalen, seier ho.

Kjend professor

Dei språkinteresserte kan mellom anna gle seg til å høyra professor Sylfest Lomheim snakka om kva plass vestlandsdialektane har i verda i dag. Dei kan høyra Ingmar Ljones snakka om språk og identitet, og dei kan høyra Johan Storm Munch fortelja om dialektbruk i litteraturen til Hans E. Kinck. Stadnamnentusiastar kan få tips om stadnamninnsamling på ein stadnamnverkstad leia av Karl Peder Mork, som

Elles står mellom anna forteljarkurs, ymse friluftsaktivitetar, festivalgudsteneste og lesestund for dei minste på programmet. Kulturminnedagen til Kvam herad er baka inn i laurdagsprogrammet. Mellom anna inviterer heradet til gratis mat i ungdomshuset Haugatun. Både fredags- og laurdagskvelden vert det dans i Haugatun.

Lokal identitet

Jåstad fortel at det er fleire gode grunnar til å starta ein dialektfestival. Ein av dei er at ein ønskjer å styrkja den lokale identiteten og det lokale språket.

– I dag glir me ubevisst meir og meir over til engelsk. Samstundes dominerer bokmål i norske medium. Den immaterielle kulturarven som ligg i dialektane, er ein viktig del av den lokale identiteten vår, seier ho.

Festivalen er spreidd ut over store delar av Strandebarm. Det er ifølgje Jåstad ikkje tilfeldig.

– Me ønskjer å ta i bruk heile bygda og visa fram fasilitetane som finst. Me håpar folk frå heile Kvam kjem, seier ho.

Arrangørane håpar at festivalen skal styrkja samarbeidet mellom laga i Strandebarm.

– Frivillig arbeid og dugnad er gode greier, men det er mykje lettare å få til noko dersom fleire lag samarbeider, seier ho.

Stort dialektprosjekt

Ifølgje Jåstad er festivalen ein del av eit stort dialektprosjekt i Strandebarm. Lokale ord og uttrykk vert samla inn, og målet er å publisera det innsamla materialet i ein lyddatabase. Håpet er at festivalen skal gjera prosjektet betre kjent.

Som ein del av prosjektet har elevar ved Strandebarm skule arbeidd med dialektar. Funna deira skal presenterast til elevar, lærarar og andre interesserte fredag.

– Elevane har samanlikna dialektuttrykk før og no og sett på dialektskilnader mellom dei ulike bygdene, fortel Jåstad.

Om interessa for festivalen vert stor nok, kan det verta nye utgåver i framtida.

– Me må først sjå korleis det går denne gongen, men det hadde vore veldig kjekt å også få til noko liknande lenger inne i Kvam, seier ho.