Vil skapa bygdefest med regnbogeflagg
Aldri før har det vore arrangert prideparade i Kvam. Dette ynskjer Dan Børve, òg kjend som kunstnar og performanceartist Dany Devero, å gjera noko med.
Ifylgje Børve har ikkje Kvam herad hatt noko liknande tilbod til skeive tidlegare. Galleri Skarpeteigen, kor Børve sjølv er galleriinnehavar, skal syrgja for at heradet får sin fyrste fargerike parade. Arrangøren har valt å kalla han Bygdapride, og han skal markera for mangfald og kjærleik, fortel Børve.
Ynskjer å laga bygdefest
Markeringa er eit gratis arrangement som er tenkt å vera for alle, vektlegg Børve.
— Ein treng ikkje vera homofil, lesbisk eller transperson for å gå i ein parade. Arrangementet er for mangfaldet, for openheit og inkludering, seier han.
Sjølve paraden startar ved Kabuso i Øystese fredag 17. september. Før toget går vil det vera ein open debatt med temaa «skeiv på bygda» og «eit inkluderande samfunn». Nokre av dei som er inviterte til å delta i debatten, er representantar for Skeiv Verden Vest og Kvam herad, opplyser Børve i eit facebookarrangement.
Dei som møter opp, vil få tildelt regnbogeflagg, og dei som ynskjer det, vil òg få høve til å verta sminka, fortel Børve. Han er oppteken av at ein må koma som ein er, og at ein saman skal skapa ein skikkeleg fest i bygda.
Fjesboka kan òg informera om at DJ MariekeSeastar byr opp til dans utanfor Ingebrigt Vik-museet etter toget har nådd endestasjonen, og musikalske innslag, performance art og quiz for born og ungdom er noko av det som står på programmet seinare på kvelden.
— Er Kvam klar?
Arrangørane bak Bygdapride har vore i dialog med ordførar Torgeir Næss i samband med paraden. Han tykkjer at det er gledeleg at Pride kjem til Kvam og oppfordrar dei som kan, til å møta opp.
— Det er viktig å markera pride. Det finst nok framleis mange som er usikre på eigen identitet og skjuler kven dei eigentleg er, seier ordføraren.
Regnbogefargane vil ikkje berre fargeleggja Øystese, for heradet har kjøpt inn flagg som skal veiva i vinden ved Kvam rådhus denne dagen.
Børve meiner at det er på høg tid at Kvam lagar ein parade som markerer mangfald, og viser til at både Voss, Samnanger og Odda har fått det til tidlegare. Ifylgje arrangøren kan ei slik tilstelling vera med på å betra bygdesamfunnet. Men det er eitt spørsmål Børve ikkje vil få svar på før sjølve dagen:
— Er Kvam klar? spør han.
