Vil pussa opp hus
Fosse-Stiftinga har søkt Vestland fylkeskommune om 75.000 kroner i tilskot til oppgradering av Fossehuset.
Tilskotsordninga frå fylkeskommunen gjeld faste kulturminne i Kvam som er prioriterte på gul liste i kulturminneplanen.
No er det oppussing av vegger og tak i hovudsalen og «småsalen» som står for tur i Fossehuset, skriv Åse Ljones, leiar i stiftinga, i søknaden. Ho ser føre seg å pussa, sparkla og måla begge salane.
– Taket har sprekkar, og veggene ber sår etter fjerning av omnar og anna, skriv ho.
Golvarealet er på om lag 110 rutemeter, og budsjettet er på 103.000 kroner. På grunn av høgt tak i hovudsalen må rullestillas leigast inn. Planen er å gjera arbeidet anten i sommar eller ved årsskiftet.
Fosse-Stiftinga overtok det tidlegare bedehuset i november 2021. Sidan har stiftinga gjennomført fleire utbetringar. Ny ytterdør er på plass, rullestolrampe er bygd, og fyrste etasje er totalrenovert. I tillegg har hovudsalen og småsalen fått slipt golv og nytt lys- og lydutstyr. Også varmepumper og rullegardiner er installerte.
