Vil inspirera til å skriva

Det heile kom i stand då den tidlegare skribenten etterlyste eit inspirasjonskurs. Han hadde vore med på noko liknande for mange år sidan, og spurde om det var aktuelt, fortel redaktør for årboka, Bodil Eide Laupsa. Ho tok det opp i redaksjonsnemnda. Deretter vedtok styret at kurset skulle bli ein realitet.

Laupsa seier nemnda har fått ansvar for å arrangera kurset. I skrivande stund er det 13 påmelde, inkludert dei fem i nemnda og tilretteleggjar Randi Jåstad. Men det er plass til fleire.

– Me håpar å nå nye skribentar. Eg er nøgd med at tre eller fire av dei påmelde er fødde på 1980-talet. Det er ingen yngre påmelde endå, men dei er hjarteleg velkomne, seier Laupsa.

– Få lyst

Korleis ho skal lokka unge til å skriva for årboka, veit ho ikkje.

– Dei som bidreg med tekstar i boka, får eit honorar. Dei unge treng vel pengar? spør redaktøren.

Forma på kurset er ikkje klar. Vona er å laga eit skrivemiljø der deltakarane kan spørja kvarandre om råd og inspirera kvarandre, ifylgje redaktøren. Skribentane skal læra korleis dei kan byggja opp ein tekst. Målet er at fleire skal få lyst til å skriva og at tekstane i årboka vert endå betre, seier Laupsa.

– Justerer opplegget

Jåstad er hyrt inn for å styra ordet, men det betyr ikkje at det er ho som skal halda heile kurset, forklarer Laupsa. Blant deltakarane er det fleire som har skrive for årboka tidlegare, og redaktøren vonar alle skal dela kunnskap og erfaringar.

– På den fyrste samlinga skal me kartleggja kva deltakarane ynskjer, og så vert opplegget justert etter det, seier ho.

Kursdeltakarane skal få tips om korleis dei kan gripa fatt i saker, kven dei kan intervjua og kvar dei kan finna gode kjelder. Laupsa seier det er mange som har tankar, men ikkje kjem i gang med å skriva.

– Når ein skal skriva, må ein få ånda over seg. Me vonar kurset kan gje inspirasjon til å koma i gang, i håp om at tekstane vert ferdige tidsnok.