Vil ha sider både på kart og i drink

Christer Økland er direktør for mat og drikke i Fjordtind Hotels AS som driv hotellet i Øystese. Han fortel at hotellet ynskjer å utvida den lokale satsinga og verta eit skikkeleg «siderhotell». I kjellaren kan ein finna fleire ulike typar alkoholhaldig eplesaft. Desse kan nytast som dei er, men Økland har andre planar.

— Me ynskjer å ta steget vidare, og jaktar på innspel til drinkar med sider som me kan servera i baren, fortel han.

Sider som ein del av ein drink er noko Økland har tru på, av fleire grunnar. Han nemner mellom anna boblene, som kan spela ei forfriskande rolle. Syra og søtleiken frå epla kan skapa gode smaksopplevingar. Økland trur at det er mange sprudlande drinkar som kan endrast. Kva med ein Aperol Spritz med sider i staden for prosecco, til dømes?

Ifylgje Økland er ikkje sider i drinkar noko dei tilsette i baren har eksperimentert med enno. Dei ynskjer å få siderbaren opp og fram og er lystne på bidrag frå ålmenta.

Ideane håpar han kjem på fredag når hotellet vil stella i stand ein drinkmiks-konkurranse. Siderglade vert oppmoda til å stilla opp med bidrag til drinkar der epledrykken skal spela den sentrale rolla. Økland seier at det skal vera eit lågterskeltilbod — hotellet stiller med ingrediensar, gjestene stiller med idear og miksing.

Drinkane skal dømmast av eit eige drinkpanel og ein tilfeldig representant frå gjestene. Og vinnaren vil ikkje berre få heider og ære den eine kvelden. Drinken vil verta ein del av barmenyen ut året.

Men skal det verta noko konkurranse, lyt folk koma i resepsjonen på hotellet og melda seg på, seier Økland. Siste frist for påmelding er torsdag.

Helga vil elles by på marknad, siderleggingskurs med Eivind Vangdal, underhaldning frå ei pallescene i skjenkeområdet i regi av sidersommelier Thomas Digervold, sideroppleving i Eldhuset på Spildegarden og sidersmaking og fest i Holmatun.

Ifylgje festivalgeneral Marit Buttingsrud er det kome 90 prøvar til siderkonkurransen. Det er truleg ny rekord, og nivået er høgt, melder ho.