Vil avskilta stifting i arbeid med skuletomta: – Vil vera uheldig for omdømet

Fylkespolitikarane har allereie samrøystes valt tomt, men vedtaket i november hausta kritikk frå mellom andre ordførar Torgeir Næss (Ap) i Kvam herad. Han meiner dei folkevalde før ei avgjerd bør vita meir om vilkåra for bruken av eigedomane som hyser dei gamle skulebygga på Tangerås.

Det same synest rådmann Anita Hesthamar, som på oppdrag frå Næss har greidd ut saka og legg henne fram for heradsstyret fredag 7. februar. Ho meiner at eigedomane fyrst bør kartleggjast av Vestland fylkeskommune, i samarbeid med Kvam herad og ein representant for staten. Dei tre partane skal truleg punga ut for gildet.

Dessutan rår rådmannen heradsstyret til å be fylkeskommunen gjera det fylkesutvalet, vel å merka ikkje heilt utan kny, hoppa bukk over: Ho vil leggja forprosjektet som prosjektleiar Knut Markhus førte i pennen i fjor, ut på høyring før sommaren. Dette bør gjerast av respekt for alle aktørane som har medverka, skriv ho.

– Var klar over mogeleg konflikt

– Bør ikkje delta

Styremedlem Sverre Øyvind Sørnes i Fosse-Stiftinga er gjennom selskapa Hardanger Trivsel og Nyskaping Eigedom AS og Strandebarm Panorama AS enno ein av fleire eigarar av dei aktuelle parsellane ved den gamle skulen.

Rådmannen trur det vil vera uheldig for omdømet til senteret om spørsmål om habilitet vert eit tema i ettertid. For å opptre ryddig, bør stiftinga no gå til sides i arbeidet med eigedomane knytte til gamleskulen, tykkjer ho.

Sørnes fekk ikkje berre plass i stiftingsstyret i haust, men i tillegg hovudansvaret for å arbeida med tomtesaka på vegner av stiftinga. Han har seinare arbeidd for å overtyda politikarane om at dei må peika ut Tangerås som rett stad for senteret. Og det lukkast han med, i alle fall i fylkeskommunen.

Ifylgje ordføraren har Sørnes tidlegare opplyst at han var i ferd med å selja seg ut av selskapa. Det viser seg no at det enno ikkje er gjort. I staden fekk Næss 17. januar på førespurnad ny informasjon i ein e-post frå Sørnes om at så snart Kvam herad støttar vedtaket til fylkesutvalet om tomteval, vil Trond Mohn (81), ein av dei andre grunneigarane i området, kjøpa dei aktuelle eigedomane og donera dei til Fosse-Stiftinga.

– Trond ynskjer ikkje at me skal bruka pengar på å overføra eigedomane fyrst til han, og deretter overføra dei til stiftinga. Me sparar òg tid på dette. Som vanleg opererer Trond berre med munnlege avtalar, skriv Sørnes til ordføraren.

Les også:

Ikkje andre alternativ

Rådmannen meiner det finst mange gode argument for skuletomta, og slår fast at det er «relativt stor semje» om at området er aktuelt. Ho meiner ikkje at dei involverte partane bør bruka ressursar på å greia ut andre alternativ no, sjølv om det kan føra til at dei tapar tid. Sentrumsområdet bør takast i bruk, meiner ho.

Men:

– Ein av dei største føremonene med Tangerås-området – mykje tilgjengeleg areal og etablert bygningsmasse – har også potensial til å verta ei av dei største utfordringane. Det er kostbart å utbetra, forvalta, drifta og vedlikehalda så stor eigedomsmasse, skriv Hesthamar.

Ho ottast at eigedomsmassen kan koma til å dominera drifta av senteret, at driftsinntektene kan verta for låge, og at det kan verta dårleg kapasitet til innhald og arrangement.

– Eller at eigedomen forfell, skriv rådmannen.

Ho ottast store kostnader med eventuell riving av skulebygga og grunnarbeid. Etter hennar syn krevst særskild kompetanse for å handtera det mogelege byggjeprosjektet.

Ho problematiserer elles at vedtaket i fylkesutvalet inkluderte to ikkje utbygde bustadareal som ligg nord for gamleskulen, i tomta der senteret skal lokaliserast. Derimot vart ikkje gards- og bruksnummeret til den gamle fotballbanen, midt mellom den gamle ungdomsskulen og barneskulen, nemnt i vedtaket. Rådmannen rår frå å ta med bustadområda i kartlegginga.

Sørnes opplyser i e-posten til ordføraren, som sist veke bad om ei oppklaring, at alle dei nemnde eigedomane skal vera med. Til HF skriv han i ei tekstmelding at det var ei forgløyming at fotballbanen ikkje vart teken med, og at dei to bustadområda vert vurderte av stiftinga.

– Må vera opne

Så seint som 20. januar skreiv Sørnes på vegner av styret i stiftinga til Kvam heradsstyre at ein ikkje må bruka meir tid på «forprosjektet til Knut Markhus». Stiftinga oppmoda heradsstyret om å støtta vedtaket til fylkesutvalet, sidan det ikkje finst argument mot å gjera det, og hevda at det vil vekkja oppsikt om politikarane gjer noko anna.

Rådmannen framhevar i sakspapira at partane må vera opne for innspel, samarbeid og medverknad dersom senteret skal verta godt forankra. Sjølv om ho har forståing for at stiftinga ligg nokre steg framføre og er utolmodig, meiner ho at det enno manglar avklaringar i saka. Kanskje er eit hovudprosjekt på tre år for lenge, men kartlegging og avklaring trengst før ein kan gå vidare med å realisera senteret på Tangerås, skriv ho.

– Det er viktig at flest mogeleg aspekt kjem fram så tidleg som mogeleg, også for ikkje å måtta starta heilt på nytt om det likevel skulle visa seg at Tangerås-området ikkje er eigna, skriv Anita Hesthamar.

Ho meiner at ei gradvis utbygging av senteret kan vera gunstig, særleg med tanke på den økonomiske situasjonen til Kvam herad. Ho føreslår difor at heradsstyret oppmodar Fosse-Stiftinga om å utarbeida ei prioritert liste med element som senteret bør innehalda.

Stoda tilseier at heradet ikkje har mykje pengar til investering i eller drift av senteret. Det ligg i korta at Kvam herad kanskje må yta ein tredel. Risikomomenta i prosjektet må avklarast betre, meiner Hesthamar, som meiner det er vanskeleg å spå om kor mange som vil vitja senteret.

Formannskapet drøftar saka 31. januar. Ordføraren har fått førespurnader frå folkevalde om å leggja til rette for at ei synfaring på tomta. Næss tok det opp med stiftinga og fekk fyrst til ein avtale for dei som ville på kort varsel denne veka, men det fekk han politisk kritikk for. Han avlyste avtalen. Torsdag hadde han ikkje fått svar på ein ny førespurnad om tid komande veke, opplyste han til HF.

Les også: