Veteranferje fekk mest
M/F «Folgefonn» får millionar frå fylket.
Hovudutval for kultur, idrett og inkludering i Vestland fylkeskommune har delt ut like over 20 millionar kroner til verna og freda fartøy i 2023. Av dei 20 millionane går 15,5 millionar til sikring og istandsetjing av fartøy. 4,6 millionar går til forvalting og drift, ifylgje vlfk.no.
Den største løyvinga går til M/F «Folgefonn», som er eigd av Hardanger og Voss museum. Museet får 3 millionar kroner til sikring og istandsetjing og 188.000 kroner til forvalting og drift.
M/F «Folgefonn» ligg for tida i tørrdokk på Bredalsholmen Dokk og Fartøyvernsenter i Kristiansand. Prosjektleiar for fartøyvern ved senteret, Bjørn Anders Nesdal, fortel at båten har vore på senteret sidan hausten 2017. Ein held for tida på med å skifta plater i skroget. Når dette og ein del anna arbeid er ferdig, skal båten attende til Hardanger. Når det skjer, kjem an på økonomi. Arbeidet er enno ikkje halvferdig.
– Me kan ikkje gjera arbeidet på dugnad, og er heilt avhengige av løyvde midlar. Me utfører arbeidet etter kvart som pengane kjem inn. Dess meir pengar som vert løyvde til båten kvart år, dess raskare går arbeidet, seier Nesdal.
Fleire av fartøya til museet får pengar. S/J «Mathilde» får 630.000 kroner til sikring og istandsetjing og 876.040 kroner til forvalting og drift. M/K «Vikingen» får 100.000 til sikring og istandsetjing og 142.000 kroner til forvalting og drift. M/Y «Faun» 149.000 kroner til forvalting og drift.
