Verdfull båt vart øydelagd
Ein rubbhall rasa saman og knuste ein båt hjå Hardanger fartøyvernsenter i vinter.
Kraftig snøvêr var årsaka til at hallen rasa saman, opplyser Hardanger fartøyvernsenter i eit presseskriv. Den skadde båten er ein hardangeråttæring – altså ein robåt med fire årepar. Båten var den einaste av sitt slag hjå fartøyvernsenteret, og har vore nytta ved museumsavdelinga i nær 25 år.
Forsikringsoppgjeret etter hendinga dekte ikkje mykje av verdien til båten, står det i skrivet. No har fartøyvernsenteret sett i verk ei pengeinnsamling med von om å få bygd ein ny båt. Båten skal vera ein kopi av ein 1800-tals kyrkjebåt frå Sørfjorden. Kostnaden er nær 300.000 kroner totalt.
Åttæringen som vart øydelagd, var bygd av båtbyggjar Peter Helland-Hansen. Helland-Hansen er leiar ved småbåtverkstaden til Hardanger fartøyvernsenter, og er òg han som skal byggja ny båt. Det skal han gjera saman med båtbyggjarlærling Jonathan Høj, opplyser fartøyvernsenteret i pressemeldinga.
