– Vellukka jubileumsdans
Om lag 220 personar fekk oppleva det som kan verta den siste dansen med Lunick Five og Last Explosion.
– Det var god stemning. Eg trur publikum hadde det kjekt, seier Jon Kjosås, vokalist i Lunick Five.
Då HF snakka med han laurdag føremiddag, var han i Holmatun for å rydda opp etter festen. Fleire Kjosås hadde snakka med, kunne stadfesta at det hadde vore god stemning og at dei fekk friska opp gamle minne. Nokre hadde budd i bubil på utsida av lokalet.
Dei to banda delte speletida mellom seg. Fyrst spela Lunick Five i om lag ein time, deretter Last Exlosion like lenge. Etter ein halvtime til med Lunick Five var det Last Explosion som avslutta. Den siste økta vart lenger. Bandet gjekk av scena klokka 00.45.
– Fleire tilskodarar heldt ut lenge. Me hadde planlagt at den siste økta kunne bli utvida litt, om det var folk att, seier Kjosås.
Også Stein Pedersen frå Last Explosion var nøgd med festen.
– Me hadde det veldig kjekt, så det var eit vellukka arrangement. Eg trur publikum kosa seg, seier Pedersen.
Kjosås fortel at dei fleste oppmøtte var over 50 år, men at det òg kom nokre ungdomar. Mellom anna hadde han sjølv nokre barneborn som hadde møtt opp.
– Den eldre generasjonen var i fleirtal, for å seia det mildt, seier han og ler.
170 billettar var førehandsselde, og dei som hadde kjøpt desse, var sikra ein stol å sitja på. I tillegg vart det selt mellom 20 og 30 billettar i døra. På toppen hadde bandmedlemene med seg følgje. Tilskodarane fekk sjå bilete og filmar, i tillegg til å høyra musikk.
– Eg har høyrt at bilete seier meir enn ord. Det kan vera noko i det, seier Kjosås.
I løpet av kvelden vart det rydda vekk fleire og fleire bord, for å utvida dansegolvet. Ifylgje Kjosås var det tett med dansande mykje av tida.
– Nokre hadde endå fysikk til å dansa, seier han.
Kjosås veit ikkje om det vert fleire sceneshow med bandet. Bandmedlemene er einige om at dei ikkje har sett sluttstrek endå, sjølv om det ikkje er planlagt nye framføringar.
– Det har dei siste to åra vist seg at mykje har med helsa å gjera. Neste år er eg 80 år, og dei andre er fem år yngre enn meg. Det er klart: Ein ikkje veit kva som skjer, seier Kjosås.
Les også:
