Vekkjer Bygdalarm frå dvalen

Musikk- og festivalinteresserte kan gle seg. Det vert ei ny utgåve av Bygdalarm til sommaren.

Åstaden vert den såkalla meieritomta i Norheimsund. Festivalsjef Ida Sørheim er for tida på ferie, men nestleiar og artistansvarleg Siri Sandven Oma fortel at styret er i full sving med planlegginga.

– Programmet byrjar verta klart, og allereie i desember kjem me til å koma med dei første artistsleppa, fortel ho.

Sjølv om det vert eit nytt festivalområde i år, vil det meste verta som før.

– Det nye styret skal prøva å ha den same stilen som det gamle styret. Den største endringa vert den nye staden, seier Oma.

Ho trur ikkje pausen på eitt år har fått publikum til å gløyma festivalen.

– Eg er overtydd om at me har eit stort og trufast publikum som vil koma attende til sommaren. Dessutan skal me i år jobba hardt for å lokka fleire unge på 18 til 20 år til festivalen, fortel ho.

Festivalen går av stabelen 6. og 7. juli.