Vegar og Jon Fosse på nynorsk bestseljarliste
I det nynorske litteraturåret 2021 har sakprosa og strøyming utmerkt seg. Halvor Folgerøs skildring av farlege vestlandsvegar er blant bøkene frå Samlaget som selde best.
Edmund Austigard er administrerande direktør i Det Norske Samlaget, og summerer overfor Nynorsk pressekontor opp kva som har prega nynorskbokåret 2021.
Han nemner at mangelen på andre kulturtilbod under pandemien kan ha styrkt etterspurnaden etter litteratur. Den positive trenden heldt fram også under gjenopninga i haust.
Utanom forfattar-veteranane Jon Fosse og Marit Eikemo, med respektive «Septologien» (alle bind) og «Team Tuva», har debutantane Dordi Strøm og Marie Tveiten selt bra i 2021.
Elles vil Austigard nemne at det er viktig for nynorsken med nynorskskrivande på andre forlag òg, som til dømes Carl Frode Tiller, som gir ut bøker på forlaget Aschehoug.
Håpar på større satsing
Blant dei om lag 100 titlane som blir utgitt på Samlaget kvart år, er kring 20 retta mot barn og unge.
– «Pølsetjuven» av Marianne Gretteberg Engedal og bøkene om «Bø og Bæ» er stadig populære. Dessutan er lettles-serien midt i blinken for unge som treng mengdetrening i lesing, og for dei som ikkje har knekt koden heilt enno, seier Austigard.
Han skulle sett at ein kunne satsa meir på nynorsk litteratur for barn i tida som kjem. Av om lag 1100 titlar som blir utgitt for barn og unge i Noreg i løpet av året, er berre 5 til 6 prosent på nynorsk. Det er for lågt, meiner direktøren.
– Ein er heldig som lesar om ein finn noko som treffer deg perfekt om ein leiter blant årets utgjevingar, når utvalet er såpass lite.
– Meir nynorsk og samisk pensumlitteratur er naudsynt for å kunne tilby like opplæringsvilkår uavhengig av hovudmål. Det er òg viktig for å byggje den språklege sjølvtilliten som gjer at ein til dømes vågar å ytre seg offentleg, påpeiker han.
– Nynorsk pensumlitteratur er viktig for det norske fagspråket og om nynorsk skal vere eit samfunnsberande språk.
Større interesse for sakprosa
I løpet av pandemien har interessa for nynorsk sakprosa auka. Det ligg an til å vere ein oppgang på 25 prosent frå året før, viser tala frå Samlaget.
«Vestlandsvegar» av Halvor Folgerø opplevde særs gode salstal utover året med 15.000 selde eksemplar.
Austigard vil òg trekkje fram den ferske sakprosa-serien «Krisetid», som fortel om korleis menneska har opplevd og takla kriser.
– Med årets «Krisetid» og «Norsk røyndom» frå 2018 har vi treft publikum i eit nytt format, til dømes på ungdomstrinnet. Dette er bøker vi trur sel bra fordi dei er viktige, utdjupar han.
Neste år
På spørsmål om kva som vil prege det komande året, trur Austigard sakprosa vil halde fram med å skape engasjement.
Papirbokmarknaden har kanskje hatt ei svakare utvikling, medan lydbøker, spesielt strøyming av lydbøker har hatt sterk vekst.
– Eg er fornøgd med at vi har over 200 titlar som lydbok ved utgangen av dette året. Vi har planar om å halde fram med å gjere mange ferske titlar tilgjengelege i 2022.
– Totalt sett ser 2021 ut til å bli ganske likt fjoråret, stabilt og godt, avsluttar Edmund Austigard.
