– Var klar over mogeleg konflikt

HF prøvde før jul, i samband med vedtaket i fylkesutvalet i november om å velja tomt, å få Fosse-Stiftinga til å kommentera vurderingane styret har gjort av Sverre Sørnes og eigarskapen hans før han fekk plass i styret. Ljones viste den gongen HF vidare til Sørnes sjølv.

No har rådmannen teke opp faren for interessekonfliktar i offentlege sakspapir. HF tok difor kontakt med Ljones igjen denne veka for å få kommentarar til saka. Onsdag, før ho hadde lese sakspapira skikkeleg, sa ho at stiftinga har vore merksam på den mogelege interessekonflikten eigarskapen hans på skuletomta kunne representera.

Samstundes viste ho til at Sørnes etter hennar syn ikkje vil få økonomisk fordel i saka. Stiftinga har hatt tillit til munnlege lovnader som er formidla frå Trond Mohn via Sørnes om at eigedomane vil verta skøytte over så snart dei naudsynte vedtaka er gjorde, opplyste styreleiaren.

Torsdag ynskte ikkje Ljones å svara på fleire spørsmål om saka. Ho viste i staden til ei utgreiing om habiliteten til Sørnes som han sjølv sende til heradsstyret onsdag kveld. E-posten er vel å merka underskriven av Kaj Wigum, ein annan medlem i stiftingsstyret.

Etter Wigum, tidlegare advokat, sitt syn er det i samband med avgjerder i ei sak nokon kan vera ugild. Han påpeikar i e-posten at avgjerda i styret om å satsa på skuletomta vart teken før Sørnes fekk styreplass og ei byggjenemnd var oppretta. Han skriv vidare at rolla til Sørnes er å bidra til at tomta vert overført gratis til stiftinga, og at han ikkje har noko å tena på det. Utan Sørnes ville ein ikkje fått gratis tomt, skriv han.

HF sende onsdag kveld Wigum ei rekkje spørsmål om vurderingane. Då HF ringde han torsdag, ville han ikkje svara på spørsmål om saka fordi han ikkje stolar på journalisten.