Vamp kjem til Norheimsund

Hardingtonar 7.–10. juni startar i år som vanleg fredag kveld med opningskonserten til Bergen filharmoniske orkester. Laurdag kveld kjem eit anna høgdepunkt frå same scene. Då spelar Vamp i Norheimsund idrettshall, opplyser Solfrid Aksnes på vegner av Hardingtonar.Bandet frå Haugesund høyrer til eliten i det norske musikklivet, og har utvikla sitt eige, spesielle uttrykk i møtet mellom lyrikk og musikk, heiter det i ei pressemelding. Vamp har uansett treft nordmenn midt i folkesjela. Det heiter at bandet er som vestlandsvêret – fullt av kontrastar. Vamp har drive på i 26 år og trollbind framleis med musikk som spenner frå det dramatiske til det lune. Det har kome i alt 14 populære album frå gjengen. Ti er studioinnspelingar. Til saman er det faktisk selt godt over éin million Vamp-plater. I karrieren har bandet fått Spellemannprisen fem gonger. I tillegg kjem både Prøysenprisen og Medaasprisen.Det siste albumet kom i oktober med tittelen La la la. På konserten i juni får publikum i Norheimsund høyra Øyvind Staveland på fele, fløyter, vokal, bratsj og trekkspel. Jan Toft syng og spelar gitar. Odin Staveland bidreg med trommer, vokal, piano, perkusjon og trekkspel. Dei andre bandlemene er Bjørn Berge (gitarar, banjo, vokal), Kjetil Dalland (bass, kor) og Lars Eirik Støle (orgel, trekkspel, synth og kor). Saman byd dei på folkemusikk, viser og rock og sikkert litt til.