Utne Hotel feirar 300 år
– Det er med andakt, respekt og audmykt, seier Margaret Elin Hystad, som eig det historiske hotellet.
– Me har jo overteke noko som har hatt og har stor betydning i lokalmiljøet. Så er det ein kulturarv som me har teke på oss å føra vidare og vareta. Det er i alle fall intensjonen min, fortel ho.
Jubileet har hotellet feira med ulike arrangement gjennom året. Det har vore fokus på mat- og siderkultur, driftige damer og kjende kulturpersonar i hotellet si historie, ifylgje ei pressemelding. I år vart også Jon Aga frå Ålvik skriven inn i hotellet si historie.
Ifylgje pressemeldinga har han vidareført lokal mat og tradisjonar på eit høgt nivå i sitt konsept, kombinert med hotellets historie og kultur.
No vert feiringa avslutta med middag på hotellet og konsert med Herborg Kråkevik og pianist Espen Berg i Utne kyrkje komande laurdag. Det er same datoen som driftsløyvet vart stempla i 1722.
Etter jubileumskonserten vert hotellet stengt i ein månad for å rigga til julefeiring. Hystad ser fram til ein rolegare periode. Planen er likevel å prøva å halda drifta oppe så mykje som råd heile året.
Les også:
