Urpremiere under Bygdalarm
Verket Stormstillaren vert framført for fyrste gong under Bygdalarm.
Det skjer laurdag 2. juli i kafeen til Hardanger fartøyvernsenter i Norheimsund, ifylgje ei pressemelding frå arrangørane, Kvam Mållag og Bygdalarm.
Stormstillaren handlar om barndom og identitet, om å reisa bort og å lengta heim – om det urolege mennesket som står i fare for å lengta seg bort frå sjølve livet, heiter det i pressemeldinga.
Kvemming Sondre Hallvardson Bjørgum og Geir Bremer Øvrebø har høvesvis skrive tekstar og komponert elektroniske musikkuttrykk som vert fletta saman.
Bjørgum har utdanna seg som dokumentarfilm-regissør og tekstforfattar. Han er kjend for mellom anna TV-serien Toll på TV 2 og dokureality-serien Vita og Wanda på NRK. Han kan skilta med fleire nominasjonar til dokumentarfilmprisar. Bjørgum har òg gjeve ut fleire diktsamlingar. Til hausten kjem ei ny.
Geir Bremer Øvrebø har vore profesjonell musikar sidan 1985, og arbeider både som komponist, produsent, studioteknikar og utøvande musikar i sjangrane jazz, rock og pop. Han har komponert musikk til ei rekke teaterframsyningar og filmar, og har laga lyddesign til reklamefilmar og dataspel.
