Ungt blod i historisk redaksjon
Bodil Eide Laupsa (42) er truleg mellom dei yngste redaktørane «Gamalt frå Kvam» har hatt gjennom 80 årgangar.
– Det var ein uventa førespurnad. Eg har aldri sett på meg sjølv som ein redaktør, seier Laupsa.
Likevel takka ho ja då Anne Liv Soldal, styremedlem i Kvam soge- og kulturminnelag, ringde og spurde om ho ville vera redaktør. Laupsa kjende til «Gamalt frå Kvam» frå jobben som grafisk designar i Glynt AS. Dei siste åra har reklamebyrået hatt ansvar for å designa og brekka boka. Sidan ein del av jobben til Laupsa går ut på å samla tekstar og halda orden på filer, tenkte ho at oppgåva kunne passa.
– Det er ting andre ofte kvir seg litt for, men det kostar ikkje meg så mykje. Eg veit kva ei trykksak krev og har det som ein del av kvardagen, seier Laupsa.
– Ingenting som brenn
Sidan Laupsa har ein svoger som er redaktør i HF, var ho spent på kor stor arbeidsmengda skulle verta.
– Eg har sett at han jobbar dag og natt, men i boka er det ikkje nyhende. Tvert imot. Det er ingenting som brenn, og eg kunne gjera arbeidet når eg sjølv ynskte, seier Laupsa.
I hovudsak har ho stått for det administrative i bokredaksjonen etter ho vart redaktør i januar. Ho har kalla inn til møte, bidrege med å samla tekstar og vore med på utval og redigering. Dei andre redaksjonsmedlemene har, ifylgje Laupsa, bidrege med stort og smått. Spesielt trekkjer ho fram Birger Linga og Oddvar Skogasel. Dei har vore med i redaksjonen lenge, og kan svara på alle spørsmål ho måtte ha.
Ragna Helene Soldal er ei fargerik dame som det er kjekt å ha med på laget, seier Laupsa. Kjell Øvrevik har representert soge- og kulturminnelaget i redaksjonen. I tillegg har Sveinung Time, som tidlegare var redaktør, gjeve den nye redaktøren gode tips.
– Dei er kunnskapsrike folk. Eg har mykje å læra av dei, seier Laupsa.
Med sine 42 år er ho truleg blant dei yngste redaktørane i boka si historie. Sjur Tarjei Fykse var redaktør då han var 32 år, har Anne Liv Soldal klart å finna ut.
– Eg er no gamal i forhold til det, seier Laupsa.
– Mykje om barndom
11 personar har bidrege med tekstar i boka. Mellom anna kan ein finna to tekstar frå Reidar Storaas, som døydde i januar. Ifylgje Laupsa har redaksjonen endå ein tekst frå han liggjande til neste utgåve.
– Eg har fått niesa mi, Ingrid Gravdal, til å skriva i boka. Ho har jobba litt for HF, og eg kan tenkja meg at ho er tidas yngste skribent, seier Laupsa.
I boka får lesarane innblikk i historie. Det er mykje om barndom i denne utgåva, opplyser Laupsa. Mellom anna kan ein lesa om barndomen på Botnen.
– Ragna Helene og eg har prøvd å tyda krusedullane av handskrifta i Nils Botnen sine bøker. Det var ganske utfordrande med gamal norsk og ord frå 1870-talet som me ikkje brukar i dag, seier Laupsa.
Dei om lag tretti handskrivne sidene er skrivne av direkte og sette på trykk i boka. Det var ikkje lett å forstå, men det var interessant, seier ho. Særleg dei som har ei tilknyting til Botnen, vil truleg lika å lesa det.
Ein kan òg lesa om «Hansken» ved Movatnet, liljer som ei prestekone tok med seg til Hellestveit, Vidar Eide, som laga skoskeier til han var 109 år, barndomsminne frå Ålvik og eit historierikt piano som har funne tilbake til «heimstaden» Øystese. Det er eit stykke i boka om 95-årsjubilanten Haugatun i Strandebarm. Lesarane finn òg ei historie om ungdomshuset Lidarende, som fyller 100 år, og ungdomslaget Samhald, som er 110 år gamalt.
Ugla er favoritten
Aller best likar redaktøren stykket frå Ugla. Brevet er skrive av ein, for lesaren, ukjend skribent. Ifølgje Laupsa var det viktig å finna ein samfunnsengasjert person som følgjer med på kva som skjer.
– Stykket skal skrivast som eit brev frå Ugla til Lerka i sør, og handla om Kvam. Elles er det ingen føringar. Eg synest det er godt skrive i boka, seier Laupsa.
På eit medlemsmøte i Kvam soge- og kulturminnelag tysdag vert det slepp av 2024-utgåva. Då skal Laupsa presentera boka. Boka er ei årbok for dei kring 480 medlemane i Kvam soge- og kulturminnelag. Alle får kvar sitt eksemplar. Det får også sponsorar og støttespelarar. Til saman er det trykt 1.250 eksemplar av boka. På boksleppet skal kåsør Arve Thorvik fortelja om heimbygda Øystese på 1950- og 1960-talet, og Marte Linga skal opptre med hardingfele.
Produksjonen av neste års bok er allereie i gang. Redaktøren skulle gjerne hatt endå fleire skribentar.
