UKM: – For ungdom, av ungdom

På programmet stod alt frå tysk song til keramikk. Ei stor scene, lys, lyd, røykmaskin og såpebobler danna ramma for framsyningane.

Vidar Sangolt i Kvam kulturskule var ansvarleg for arrangementet. Han seier UKM skal vera ein samlingsstad der ungdom kjem saman og utøver kultur for kvarandre og publikum. Det er nokre år sidan UKM vart arrangert sist. 25 innslag var påmelde.

Fekk helsingar

Storparten av innslaga var av det musikalske slaget. Seks unge kunstnarar viste fram bilete og skulpturar. Kunstnarane vart òg presenterte gjennom bilete på scena.

Før var UKM ein konkurranse der nokre av deltakarane gjekk vidare til ein regional konkurranse.

– No handlar det om å skapa eit bra miljø og spela kvarandre gode, seier Sangolt.

Eit fagpanel er likevel framleis ein del av arrangementet. Alle deltakarane fekk tilbakemeldingar og diplom av panelet, som romma kulturskulerektor Anne Cathrine Eiken, kunstnar Linda Lid og kulturskulelærarane Amalie Jensen Tolo og Aksel Holdhus.

Gjennom det tre timar lange arrangementet kom det korte filmhelsingar på storskjerm frå kjende kulturpersonar som Heidi Marie Vestrheim, Torstein Lofthus og Odd Nordstoga. Dei oppmuntra og heia på ungdomane som skulle fram og prestera.

– Kvelden synte at det er mange unge talent i Kvam, seier Sangolt.

Mange involverte

24 av dei 27 kulturskulelærarane i Kvam var med og skipa til hendinga. I tillegg var sju ungdomar med som UKM-vertar og hjelpte til med rigg, lyd og lys.

– Ungdomane har eit eigartilhøve til arrangementet – det er for ungdom, av ungdom. Det er deira arrangement, seier Sangolt.

På slutten av arrangementet takka Sangolt og Eiken alle som var med.

– Det er mange som har stått på i fleire dagar for å få dette flotte arrangementet på plass, sa Eiken til stor applaus.

Til slutt vart alle deltakarane samla på scena og fekk utdelt kvar si rose.

HF gjer merksam på at artikkelforfattaren er mediefagelevar på Framnes Kristne Vidaregåande Skule. Teksten er redigert av lærar Magnus Hisdal. Red.