UKM er tilbake
11. februar brakar det laus for unge som vil prøva seg på scena.
Ungdomsarrangementet UKM, Ung Kultur Møtest, vert skipa til i Øystese idrettshall. Arrangør og lærar ved Kvam kulturskule, Vidar Sangolt, fortel at han er spent og har store forventingar. Han vonar at så mange som mogleg i alderen 13–20 vil våga seg på scena og visa talenta sine.
Arrangementet går ut på at unge skal melda seg på og bidra meg forskjellige innslag som song, dans, band, trylling eller eigentleg kva som helst av sceneinnslag, forklarar Sangolt.
Han fortel at det vil vera moglegheiter for å stilla ut visuell kunst som fotografi, måleri og skulpturar. Ungdomane har høve til å melda seg på som konferansier, å vera med og arrangera eller bidra med oppgåver som teknikk, fotografering og video.
UKM har vore arrangert mange gonger, men hadde av ulike årsaker eit opphald nokre år. I 2023 var arrangementet tilbake i Kvam. Då deltok 27 ungdomar. I år er mellom 20 og 25 påmelde. Sangolt har tru på at arrangementet skal verta bra.
HF gjer merksam på at artikkelforfattarane er mediefagelevar på Framnes Kristne Vidaregåande Skule. Teksten er skriven som del av undervisinga. Red.
