Tveitt-tonar mellom brakar med musikalsk sus

– I åra etter at huset fall saman var det veldig emosjonelt å koma opp hit. No har eg akseptert at det er slik det er, seier Gyri Tveitt, dotter til komponisten. I solsteiken på Bjødnabrakane, nøyaktig ei veke før arrangementet, har Tveitt, Solfrid Aksnes og Geir Botnen teke turen opp lia frå Tveit for å gjera dei siste finjusteringane i planlegginga. Midt mellom braketrea ser ein framleis tydeleg konturane av ein heim. Delar av murane til hovudhuset, omnen i stova og det vesle leikehuset står framleis. Barndomsheimen til Gyri, huset der far hennar komponerte nokre av dei mest kjende hardingtonane, er borte, men vitnar likevel om ei tid med sterkt forankra musikalsk historie. – Her stod det eine flygelet pappen pla spela på, fortel Gyri og peikar mot eine enden av muren.

Samarbeid med lag

Geirr Tveitt flytta til Bjødnabrakane under krigen, og bygde då huset me i dag kan sjå spor av. Etter kvart kom også kone og to born. Den gongen var det berre ein sti opp den bratte vegen. Det fekk både familien og bygdefolket merka då materialar og flygel skulle fraktast. – Bygdefolket frakta flygel på 500–600 kilo med hest og slede opp den bratte stien. Då dei kom opp, har eg høyrt at far min heldt konsert for dei. Då var visst alt slitet gløymt, fortel Gyri. Sidan har det kome veg til Bjødnabrakane. I tillegg har rotaryklubben i Kvam bidrege med hogst i området, slik at utsikta igjen kunne koma til syne. – At eit lag i bygda tek tak saman med familien, gjer sannsynet større for at ein kan lukkast med vidare utvikling av området, seier Aksnes.

Ynskjer å fremja Tveitt

Heilt sidan starten for 28 år sidan har det vore intensjonen til Hardingtonar å fremja Geirr Tveitt og komposisjonane hans. Kvart år sidan har programmet hatt innslag av Tveitt sine verk. I år skal komponisten få ein enda større del av programmet. – Det har heile vegen vorte spela fleire av Tveitt sine verk, men i år har me arbeidd med å gje den delen av programmet endå større tyngd. Å vera her på Bjødnabrakane, med Gyri med oss, gjev det heile ein ny dimensjon. Det tek oss tilbake slik det var då stykka vart laga. Eg synest det er veldig kjekt at me no får dette til, fortel Geir Botnen, leiar i styret i Hardingtonar.

Stad med potensial

I arbeidet med programmet har det vore fokus på unge, lokale folkemusikarar på veg opp og fram. Alexander Røynstrand skal spela hardingfele, Thale Valland skal kveda, og Rolf K. Seldal skal spela slåttetromme og lur. I tillegg skal Gyri Tveitt fortelja historier frå Bjødnabrakane. – Kva eg kjem til å fortelja, er avhengig av kven eg ser her. Folk kan kanskje gje meg inspirasjon berre ved å vera til stades, seier ho. Tveitt, Botnen og Aksnes ser potensial i Bjødnabrakane til å verta nytta til meir enn arrangementet komande sundag. – Det er veldig kjekt for oss i Hardingtonar å få vera med på det som kanskje vert gjenopninga av denne staden som kulturell aktivitetsstad. Me vonar at det vert fleire konsertar her i framtida, og at staden vert utvikla med Geirr Tveitt i sentrum, seier Botnen.

Eline Sandnes Fosseredaksjon@hf.no