Tura tur nummer tre hundre

Sidan turgruppa starta opp i april 2016, har godt vaksne menn møtt opp utanfor Spar-butikken i Norheimsund på føremiddagen onsdagar. Målet er felles: å gå på tur med andre karar.

Godt skodde

Når HF svippar bortom «sparen» like før klokka 11, kjem ein etter ein turkledd kar. Turleiar for dagen er Odd Øygarden. Han rullerer på oppgåva saman med Hans Neteland, Knut Eide og Dagfinn Berge.

Øygarden verkar å vera godt budd. Han syner fram eit par flunkande nye skopar med piggar. Turleiaren innrømmer at skoa kosta ein del, men han er ikkje i tvil om at investeringa var lur.

– Eg brukar heller pengar på eit skikkeleg skopar enn eit beinbrot, seier han med glimt i auga.

Øygarden samlar gruppa og fortel at turen går til golfbana på Børve. Der vert det matpause i sola, før dei vender nasen heimover. Det er ikkje så mange alternativ når tilhøva er som dei er, forklarar turleiaren, og viser til snømengdene og dei isete vegane.

Like før avreise er ni karar klare. Frammøtet held seg stabilt på kring ti personar, opplyser Øygarden. Korkje sterk vind, store nedbørsmengder eller mange kuldegrader set ein stoppar for den turglade gjengen.

– Det gjeld berre å kle seg etter vêret, slår ein av dei frammøtte fast.

To jubilantar

I forsamlinga er det ikkje berre sjølve Karatrakk som jubilerer med 300 turar. Det same gjer ein av dei trakkande karane, Knut Eide. I oktober 2018 gjekk han tur nummer 100. I august 2021 stilte han opp då tur nummer 200 vart arrangert. Med sekk på ryggen og stavar i hendene er han klar for atter ein milepåle.

– Eg har vore heldig med helsa, slår Eide fast.

Den jubilerande turgåaren fortel at det er to årsaker til at han fast er med på Karatrakk. Den eine er at det er godt for helsa. Den andre er at det er sosialt.

– Kvemmingar er lune folk å samtala med, seier han.

Av dei 300 turane Eide har gått, er ein tur til Laupsaflyane ein av dei han hugsar best. Sjølv om enkelte i turfylgjet meinte at ruta var for tung, var det meste gløymt då dei kom til toppen og hadde fått i seg litt mat, fortel Eide.

– På toppen fekk me utsikt over heile Hardangerfjorden.

Klar for hundre til

Ifylgje Eide har dei trakkande karande vore «alle plassar som tenkjast kan». Sjølv om dei i hovudsak går i Kvam, har dei vore eit par turar til Jondal og i Samnanger.

– Har du eit turmål på ynskelista?

– Eg kunne tenkt meg å gå til Vikehedlaren (i Fitjadalen, red. merknad) ein gong til. Sist me var der, gløymde me å sjå etter kokegropene som skal vera der, seier Eide.

Den turglade karen er klar for meir. Til våren står mellom anna ein tur i området Melstveit–Melstveitåsen–Rykkje på planen.

– Vert det hundre turar til?

– Ja, så lenge helsa held fram med å spela på lag og det ikkje kjem noko i vegen, så vert det nok det.

Karatrakk er eit samarbeid mellom frivillige, Grannehjelpa og Kvam Turlag.