Trur på ein ny normal

Det er Glück-Teigland og Stig Lundblad-Sandbakk som har teke initiativ til arrangementet.

Det er andre gong ein lagar til sommarfest. Førre gong var i 2018. Då fall festen på jonsokaftan, og han var såleis grei å kombinera med eit familiearrangement tidlegare på dagen. Slik vert det ikkje i år.

Bandet The Foggy Few skal stå på scena. Initiativtakarane håpar at årets utgåve vert godt motteke hjå alle dei som har måtta venta på konsertar og festivalar i over eit år.

— Storeteigen er ein flott arena for slike kulturarrangement, seier Glück-Teigland.

Området er ute og akkurat passe stort til at det stettar alle krav frå sentrale styresmakter. Arrangementet er marknadsført mest lokalt, då dette inntil nyleg var eit krav frå høgare hald. Glück-Teigland og Lundblad-Sandbakk har merka ein stor pågang av folk som ynskjer billettar.

– Folk vil på konsert

Det har ikkje vore krevjande å få tak i artistar.

— Dei gler seg veldig til å koma ut og spela for fleire enn 20 stykk, seier Lundblad-Sandbakk.

Han kjem sjølv rett frå ein konsert i Oslo. Der spela han to konsertar for til saman 80 stykk, det var uvant.

— Folk er happy for å komma på konsert att, slår han fast.

– Definera framtida

Glück-Teigland trur at slike små tilskipingar vert meir og meir vanlege i den nye kvardagen etter pandemien. Dei små arrangørane er ikkje like sårbare for publikumsavgrensingar som store konserthus og festivalar er. Dei to trur at evenement som sommarfesten kan vera med på å definera den nye normalen for kulturopplevingar.

— For mange artistar kan det vera ei fantastisk oppleving å spela for eit lite publikum, slår dei fast.

Glück-Teigland vil óg slå eit slag for alle aktørane i konsertbransjen som driv for seg sjølve. Han har merka at stadig fleire som driv for seg sjølv, slit. Lydteknikarar og frittståande artistar har det siste året sett seg om etter andre jobbar. Difor ynskjer Glück-Teigland å bruka fleire av dei både i lokale arrangement og i Hardanger Musikkfest, der han er festivalsjef.