– Treng sårt meir stønad

– Me håpar og ynskjer verkeleg å få lov til å gle lokale og tilreisande med ny festival i 2025, men då treng me hjelp økonomisk.

Det skriv Lill-Ann Elmgren, styremedlem og økonomiansvarleg i Ålvikrock, til Kvam herad i ein søknad om kulturtilskot.

Prisveksten etter pandemien har vore enorm, opplyser ho. Kostnadene med både teknisk produksjon, overnatting, mat og transport har auka mykje meir enn det stønadsordningane har. Dessutan har dugnadsånda falle meir vekk, og dyre vaktselskap må inn for å sikra god nok tryggleik og fylgja regelverket, hevdar Elmgren.

Lokale verksemder har vorte kontakta, men responsen har vore dårleg. Styret jobbar hardt med å halda kostnadene nede og ikkje bruka pengar unødig. Berre produksjonen med lyd og lys, som lyt leigast inn, kostar 100.000 kroner. Draumen er å få dekt den summen, skriv Elmgren.

Skrivinga hadde effekt. Rådmannen løyvde nyleg eit ekstraordinært stort kulturtilskot på 30.000 kroner til festivalen, som ikkje nytta høvet og søkte om festivaltilskot i vinter.