– Trebåtane og handverkarane kjem i år òg

Fredag kjem trebåtane sigande inn i sundet i Norheimsund att. Båtane må dela scenen med andre typar handverk. I år som i fjor vert «Handverksgildet», arrangert av Handverkslaget, ein del av festivalen.

– Publikum får eigentleg to festivalar i ein. Målet er å laga eit arrangement der folk trivst, samstundes som dei får drypp med kunnskap om trebåtar og handverk, fortel festivalsjef Geir Madsen.

– Lag ein krakk!

Det vert salsbuer i Norheimsund sentrum og på fartøyvernsenteret.

– I sentrum vert det selt litt hummar og kanari. På fartøyvernsenteret er krava strengare. Her slepper me berre til tradisjonshandverk, fortel festivalsjefen.

Silje Ensby, som er formidlingsrådgjevar ved fartøyvernsenteret og har ansvar for kontakten med Handverkslaget, fortel at det truleg vert 12 utstillarar på fartøyvernsenteret.

– Mange av utstillarane kjem til å selja produkt, men samanlikna med i fjor vert det meir fokus på å demonstrera handverk og gje publikum høve til å prøva handverka sjølv, fortel ho.

Som del av dette vert det arrangert kurs i grindverksbygging, krakkproduksjon, knipling og segling. Seglkurset viste seg å vera så populært at det vart fullteikna allereie i vinter.

Ikkje berre tre

Som så mange gonger før vert det tilbod om turar på fjorden med lysfartøyet M/Y «Faun». S/J «Mathilde» skal liggja ved kaien på fartøyvernsenteret og ha barneprogram om bord.

Det vert ikkje berre trebåtar å sjå. Den tidlegare bokbåten «Epos», som har skrog av aluminium, skal fungera som føredragssal under festivalen. Om bord vert mellom anna føredrag om historia til «Epos».

Motortorpedobåten KNM «Hitra» kjem attende til festivalen.

– For nokre år sidan vart det ny publikumsrekord om bord då dei vitja trebåtfestivalen. Det er kjekt, sidan dei reiser land og strand rundt og er med på mykje, fortel Madsen.

– Fryktar vêrgudane

Dag Rune Mo har ansvaret for underhaldninga på festivalen. Dei lokale banda Acoustic Flashback og Mjødlarók skal stå på scenen. Det same skal Anita Nordheim & Blues Groove Company og Olav Stedje. Endre Olsen og Hestehandlarane avsluttar festivalen med songar av Ivar Medaas. Ryktet vil ha det til at dampen kjem til å koma.

Festivalleiinga gjer det dei kan for å fylla festivalen med spanande innhald, men er ikkje herre over eit viktig element: vêret.

– Det viser seg gong etter gong at vêret betyr mykje for kor stor aktivitet det vert og kor mange båtar som kjem. I forfjor hadde me fantastiske artistar, men kvar gong ein artist entra scenen, byrja det hølja ned. Artistane gjorde tappert det dei skulle, men dei såg knapt folk. I fjor var det derimot sol og topp stemning, fortel Madsen.

– Liten, men god

Madsen trur at det at festivalen vert arrangert i Norheimsund, gjev den ein føremon.

– Trebåtmiljøet er med på å gjera festivalen unik. Det er fleire trebåtfestivalar i Noreg. Me er den minste og beste. Ein festival treng ikkje vera stor, så lenge folk trivst, seier Madsen.

Festivalen vert arrangert for 24. gong. Madsen har vore festivalleiar sidan starten.

– Trebåtfestivalen har liksom alltid vore min baby. No vert babyen 24. Det hadde vore greitt om fleire ville ta på seg litt foreldreansvar, seier han.