Tok sjansen
Doning etter doning suste ned bakken ved Furedalen Alpin då arrangementet «Ta sjansen» vart arrangert fredag ettermiddag.
– Det gjekk forholdsvis bra, synest eg. Me var litt uheldige med vêret, men eg har inntrykk av at folk kosa seg, seier arrangør Hanne Kathrine Østby-Solberg.
Premiar vart delte ut til mellom andre deltakarane med best tid og beste fartøy. Også ein fiaskopris høyrer med, fortel arrangøren. Flest deltakarar stilte i klassen for born. Til neste år håpar ho at fleire av dei vaksne hiv seg med. Det er ikkje store krav. Ein kan aka på vanleg akebrett og ha eit enkelt kostyme på. Det viktigaste er at arrangementet lagar litt liv og røre, og at ein kan samlast om noko kjekt, seier Østby-Solberg.
23 lag var påmelde. Det er ein nedgang frå i fjor, då det var nesten 40 påmelde som stilte til start.
Årets arrangement var det tredje i rekkja, og ingenting tyder på at det skal stoppa der. Om det var vêret som gjorde at talet på deltakarar gjekk ned, eller om folk ikkje hadde fått det med seg, er uvisst. Ifylgje arrangøren var vêret regntungt då arrangementet starta, medan det letta litt då dei siste deltakarane hadde susa nedover bakken.
Det er eit stort engasjement rundt arrangementet, og det er mange som har lyst til å bidra og hjelpa til, fortel Østby-Solberg.
– Eg trur alle synest at det er kjekt at det skjer noko, seier ho.
Raudekrossen var på plass, men ingen vart skadd.
