Tok ansvar for bustad i Tyskland
Kunsthuset Kabuso har overteke ansvaret for kunstnarkåken i Berlin.
Eidfjord kommune gjorde det i haust klart at han ikkje lenger ynskjer å vera ansvarleg for leigekontrakten for ein kunstnarbustad i Berlin. Hardanger Kunstlag har i staden gjort ein avtale med Kabuso i Øystese.
Det går fram i eit brev frå leiar Johild Mæland til kommunane i Hardanger.
Endringa inneber at Kabuso skal inngå leigekontrakten og får ansvar for vedlikehald og årleg storvask i husværet. Til gjengjeld får kunsthuset disponera kåken ein månad i året.
Framleis skal Hardanger Kunstlag ha ansvar for rekneskap og budsjett. Ei gruppe på fire representantar for kunstlaget, Harding Puls, Vestland fylkeskommune og Kabuso skal tildela opphald i husværet, og kunstnarar som driv i Hardanger, skal gå fyrst i køen, ifylgje skrivet til kommunane.
Kommunane og fylkeskommunen bidreg til drifta av bustaden. I haust tok rådmannen til orde for å starta prosessen med kvitta seg med tilskotet, men politikarane ville ikkje ha noko av det.
