Tilbyr digital påskemoro

Kvissar og tevlingar er populære i påsken. Koronaviruset gjer at fleire av desse i år vert digitale.

Arne-Kristian Glück-Teigland har teke initiativet til det han kalla Kvammalabyrinten 2020. Kvar dag frå måndag til laurdag vert det publisert ein videofilm på Facebook-sida til Holmatun. I filmane skal eit knippe meir eller mindre kjende kvemmingar presentera ei kort reiseskildring. Så skal publikum gissa kvar vedkomande har vore.

– Det er krevjande tider, men ein kan ikkje leggja seg ned og døy for det. Me vil gjera noko for å engasjera folk og visa at me kjem attende når dette legg seg. For meg er påskelabyrinten til Viggo Valle (radioprogram, journ. merknad) like heilag som langfredag. Difor bestemde me oss for å laga ein lokal vri, fortel Glück-Teigand.

Kviss på Vassel

Påskekviss i eldstova har vorte ein tradisjon på påskeaftan på Vassel gard i Herand. Kviss vert det i år òg, men sidan koronaviruset herjar, vert kvissen send direkte på Facebook. Den første som skriv rett svar i kommentarfeltet, får poenga, fortel Aud Berit Garnes.

– Det vert ikkje heilt det same som om folk hadde samla seg i eldhuset, men då skjer det i alle fall noko som kan gje folk litt påskekjensle. Me skal fyra i peisen og gjera det me kan for at det skal verta koseleg. Dette er noko me aldri har gjort før, så det skal verta spanande å sjå korleis det går, seier ho.

Garnes fortel at arrangementet kan verta flytta fram ein dag. Årsaka er eit at også Jondal bygdelag har planlagt digital påskekviss laurdag.

Hjelp til ungdomslaget

Bak kvissen til ungdomslaget står Lill Brekke og mannen Kyrre Brekke. Detaljane om korleis arrangementet skal gjennomførast, var ikkje klare måndag føremiddag.

– Me held på med å prøva ulike måtar å gjera dette på, men har ikkje landa på noko. Dette er noko nytt som me ikkje har prøvd før, seier Lill Brekke.

Ho fortel at inntektene frå kvissen skal gå til Jondal ungdomslag og ungdomshuset Jonsvoll.

– Ungdomslaget har måtta avlysa fleire arrangement på grunn av koronaviruset, og mistar inntekter til drift og vedlikehald av ungdomshuset. Dette er meint som ei handsrekking frå bygdelaget til ungdomslaget.

Digitale basarar

Jondal ungdomslag plar arrangera marknad på Jonsvoll kvar palmesundag. I år vart arrangementet digitalt. På Facebook skriv laget at det vert selt lodd i heile påskeveka. Trekkinga skjer etter påske.

Også bedehusbasaren i Strandebarm er digitalisert. Margrethe Augestad skriv på Facebook at sidan det ikkje er mogleg å selja lodd i butikken i Tørvikbygd, vert det loddsal på nett eller på sms. Det vert trekking ein gong før sommaren.