Testa campingtilværet i Ålvik
Familien Dostálová er på campingferie i Noreg for fyrste gong. – Det er av og til litt utfordrande med to små born, men me kosar oss.
Det sa Lucie Dostálová, som leitte etter ei badedrakt då HF svinga innom Tyrvefjøra i Ålvik førre veke. Ektemannen og dei to borna deira hadde allereie hoppa i havet.
Dostálová og familien kjem frå Tsjekkia. I år har familien sin fyrste tur i campingbil. Dei leigde køyretøyet i Praha, og hadde vore på reis i to dagar då dei stoppa i Ålvik. Ingen av familiemedlemene hadde vore i Noreg før, og omgivnadane imponerte stort.
– Noreg er eit flott land, og naturen er heilt nydeleg! seier Dostálová.
Då HF var innom strålte sola, men for eit par dagar sidan fekk tsjekkarane oppleva skikkeleg norsk høljeregn, fortalde ho.
Familien nyttar park4night-appen for å finna campingplassar undervegs på reisa. Det var slik dei enda opp i Ålvik. Det var Dostálová glad for. Ho hadde ikkje testa det nye toalettet, men syntest at bygget såg stilig ut. Tsjekkaren hadde høyrt rykte om at norske toalett plar vera ganske reine og godt varetekne.
Tilværet i campingbil tykte ho hadde fungert ganske bra så langt. Familien hadde pakka med seg mykje utstyr. Mellom anna var syklar til alle fire pressa inn i eit lite bagasjerom. I tillegg hadde Dostálová med seg eit stort førstehjelpsskrin med medisinar for det meste.
– Mannen min ler litt av meg, men ein veit aldri kva som kan skje når ein er på tur med born, seier ho.
Familien er vande med å reisa på biltur i ferien. Dei likar å ordna seg sjølve og å kunna vera litt fleksible. Planen vidare var å besøkja Vøringsfossen. Deretter skulle dei på ein liten rundtur før dei vender heimover til Tsjekkia att.
