Telemarksduo fylte gartneriet
Det var stinn brakke på Berge Gard & Gartneri då to artistar eit stykke heimanfrå heldt konsert laurdag.
Det var tydeleg populært blant kvemmingane at Odd Nordstoga og Ingebjørg Bratland kom til Tørvikbygd for å syngja laurdag. Då billettane vart lagde ut for sal i november, gjekk det vel eit døger før konserten var utseld, fortel arrangør Anne Grete Berge, som driv Berge Gard & Gartneri.
I alt 380 personar sette av laurdagskvelden for å få med seg duoen frå Vinje i Telemark. Dei to framførte låtar både frå deira siste album, «Langt heimafrå» frå 2023, og deira fyrste felles album, «Heimafrå» frå 2013.
– Det har gått ti år frå vårt fyrste album til dette. Om ti år tenkjer me å sleppa eit nytt. Det skal heita «Endå lenger heimafrå», sa Nordstoga.
Artistane sa at dei tykte det var artig å få halda konsert i eit drivhus, og serverte den eine låten etter den andre blant monsteraer og andre grøne, eksotiske planter. Med seg hadde dei Thomas Gallatin på trommer, Tor Egil Kreken på bass og Øyvind Smidt på fele og synt.
Fleire av dei nyaste songane var inspirerte av irsk folkemusikk, fortalde duoen, som hadde vitja Irland då dei arbeidde med det nyaste albumet.
Både applausen og latteren sat laust i salen under heile konserten. Siste nummer baud dessutan på trampeklapp og allsong då Nordstoga og Bratland framførte «Olav Olav».
Før konserten vart det servert hjortegryte med ymse attåt til til dei 70–80 gjestene som åt middag i gartneriet.
– Dette er ein kjempesuksess! Det er utruleg moro, slo Berge fast midtvegs i arrangementet.
