Tek pulsen på Harding Puls

Utstillinga opnar i Kunsthuset Kabuso laurdag 4. mai. Den er kurert av Harding Puls-medlemene Aud Bækkelund og Tord Torpe, og fagleg leiar i Kunsthuset Kabuso, Sissel Lillebostad. Bækkelund fortel at 26 medlemer sende inn kunst. Kuratorane valde nokre få verk av kvar kunstnar.

– Med så mange kunstnarar vart det stor variasjon i teknikkar og materiale. Det har vore vanskeleg å laga ei heilskapleg utstilling, men resultatet har vorte veldig bra, seier Bækkelund.

På opninga vert det musikk av felespelar Knut Hamre og jubileumstale av Merethe Gauden. Tidlegare fagleg leiar i kunsthuset, Heidi Ann Jaeger, opnar utstillinga.

Meir på programmet

Utstillinga skal stå til 2. juni. Den vert ikkje den einaste markeringa av jubileet. 26. mai vert det urframføring av «Møte med eiga maske». I ei pressemelding frå Harding Puls vert framsyninga omtala som eit konsertprogram inspirert av kunstnar Lars Gunnar Polden. Framsyninga er ifølgje pressemeldinga «eit unikt samspel mellom biletkunst og musikk, som utforskar personleg kamp og søken etter identitet».

30. mai vert det «Lunsjpoesi». Der vil skodespelar Arnhild Litleré framføra poesi akkompagnert av musikar Arild B. Nielsen.

I slutten av mai er det planlagt ein workshop for skuleelevar med kunstnar Kwestan Jamal Bawan.

– Har betydd mykje

Bækkelund har vore medlem i Harding Puls sidan starten, og fortel at organisasjonen har vore viktig for henne.

– Eg flytta til Hardanger om lag då Harding Puls vart oppretta. Organisasjonen gjorde at eg vart kjend med kollegaer frå heile Hardanger og fekk eit stort nettverk raskt. Utan Harding Puls hadde nok kunstnarane i større grad sete på si eiga vesle tue og jobba med sitt, seier ho.

Kunstnarane i Harding Puls har samarbeidd om fleire store prosjekt. Bækkelund trekkjer fram landskapskunstprosjektet «Mellom himmel og fjord. SJÅ!» som eit av høgdepunkta.

– Det var veldig kjekt. Prosjektet gjekk over fleire år, og mange kunstnarar frå andre skandinaviske land var involverte. Dette gav oss nettverk utover Noreg. Dette prosjektet hadde ikkje kome i stand utan Harding Puls, seier ho.

– Oppegåande 30-åring

Harding Puls vart skipa på Utne Hotel 6. november 1993. Organisasjonen har ifølgje styreleiar Inger-Kristine Riber 67 medlemer i dag. Riber er pianist og komponist, og held til på Voss. Ho tok over som styreleiar etter Solfrid Aksnes i 2020.

Riber fortel at medlemstalet har vore stabilt dei siste ti åra.

– Eg meiner at organisasjonen i høgste grad framleis er oppegåande. Den fungerer godt som eit fagnettverk der aktive, profesjonelle kunstnarar kan møta likesinna og utveksla erfaringar, idear, prosjekt og tankar, seier ho.

– Kva har Harding Puls betydd?

– Det finst kunstnarar i Hardanger som ikkje er medlemer hos oss, så det ville nok vore kunst i regionen utan Harding Puls. Eg er ikkje sikker på om kunsten hadde vore like synleg. Store samarbeidsprosjekt får gjerne meir merksemd enn arbeidet til einskildkunstnarar, seier ho.

– Nytt stipend

– Korleis vert vegen vidare?

– Ein del medlemer har vore med sidan starten, og me håpar å rekruttera fleire unge. Me veit om ein del yngre kunstnarar som flyttar til Hardanger, og det er viktig at me er flinke til å snappa dei opp. Dess meir synleg Harding Puls er, dess større tilsig av nye medlemer vert det, seier ho.

I fjor starta Harding Puls ei prosjektstipendordning for medlemene.

– Gjennom ordninga kan medlemene søkja om pengar til eigne prosjekt. Eg håpar ordninga kan føra til at fleire prosjekt vert realiserte. Har Harding Puls ordningar som er attraktive for medlemene, trur eg at det vil føra til fleire medlemer, seier Riber.

Ifølgje Riber har kvardagen til kunstnarane vorte vanskelegare dei siste åra. Årsaka, meiner ho, er nedskjeringar i kulturbudsjetta kombinert med at fleire søkjer om pengar frå stønadsordningane.

– Når det vert mindre pengar i potten, samstundes som fleire søkjer, påverkar det kor mange prosjekt me får gjennomført, seier ho.

Ho trur at koronaviruset har skulda for at fleire treng stønad.

– Kulturlivet velta under pandemien. Me lever framleis med etterdønningane, seier ho.