Tek flett ny scene i bruk
Når Bjørn Tomren gyv laus på fyrste song i hotellhagen laurdag kveld, får han æra av å innvia ei nyvinning i Kvam: ei mobilscene.
Tidleg måndag morgon, fem dagar før konserten med Tomren, vart tilhengaren med utescena heisa varsamt, men effektivt på plass i hagen med kranbilen til Jan Mo AS. Så mange meter vart ikkje hivet på, men det spara konsertarrangøren for mykje bry med arrondering.
Sjå film av «hivet» her:
«God» klaring
Med ei vekt på bortimot 2,5 tonn – på lasta, altså – var det avgrensa kor langt kranførar Leif Mo bokstaveleg tala kunne strekkja seg. Så snart han hadde lyfta mobilscena dei naudsynte metrane frå parkeringsplassen og over ei lita skråning, sette han henne frå seg.
Resten av bukseringa måtte Vidar Sangolt, med både son og far som bistand, ordna sjølv med traktoren. Det viste seg å gå greitt, vel å merka etter litt om og men for å gå klar det næraste, lafta Sandven-naustet. Trioen lukkast med ein margin på mange centimeter.
Resten gjekk som ein leik. Scena vart dregen på rett plass. Litt seinare vart ho formeleg falda ut, ein operasjon som i teorien skal ta berre ein halv time med to personar i sving.
Dei harde fakta
Scena er produsert i Noreg levert av MTI Norge AS, som held til på Heggenes i Valdres. Listeprisen er rundt rekna 700.000 kroner, fortel styreleiar Geir Botnen, som kom seg tidleg ut for å vera vitne til det luftige spaningsmomentet måndag. Scena er finansiert med stønad frå Sparebankstiftinga Hardanger og ved endra bruk av kroner som opphavleg var tiltenkte ny tribune i idrettshallen i Norheimsund.
Dei harde fakta om scena – som er den nest største mobilscena leverandøren byd på – er at ho er 8 meter brei, 6 meter djup og 4 meter mellom scenegolv -og tak. Dei som er snøgge i hovudrekning, veit då at scenearealet er 48 rutemeter. Eit hydraulisk system heisar opp taket når scena skal setjast opp. Golvet av vassfaste antiskliplater ligg oppå kvarandre i tre delar når scena er pakka, og vert flytta på små hjul.
Sangolt køyrde eigenhendig til Valdres for å henta og frakta underverket, som har ei transportlengd på 9,5 meter og ei -bredd på 2,45 meter. Transporten gjekk fint, men det rauk med ein del diesel, konstaterer han.
Musikar Bjørn Tomren frå Tomrefjorden får altså æra av å vera fyrstemann til å ta scena i bruk under årets utgåve av Hardingtonar. Festivalen kjem nok til å verta ein ivrig brukar, men vona til eigaren er at fleire både i og utanfor Kvam ser seg mon i å leiga nyvinninga. Vestprod AS, som tilbyr lyd- og lystenester i regionen, kjem til å verta eit sentralt mellomledd i så måte.
