Teikningane tek over Kabuso

Utstillinga har tittelen «Handboren og veggfast». Fagleg leiar i Kabuso, Sissel Lillebostad, fortel at kunsthuset har kurert utstillinga sjølv. Den er inspirert av tankane til den amerikanske konseptkunstnaren Sol LeWitt om skilnaden på kunst i bøker og kunst på vegger.

– Han har filosofert rundt korleis ei bok fungerer og korleis eit veggarbeid fungerer. Han snakkar om veggen som ei kollektiv oppleving, altså ei oppleving du deler med andre, medan boka er ei personleg oppleving, seier Lillebostad.

Ho har lenge vore oppteken av kampen om merksemda vår.

– Me er omringa av plakatar og skjermar som ønskjer merksemda vår. I utstillinga prøver me å reflektera rundt dette og å sjå på om støyen påverkar konsentrasjonen vår. Kanskje er alt me vert bombardert med, ei av årsakene til at så mange unge vert utbrente? seier Lillebostad.

Lokal helt

Kabuso inviterte seks kunstnarar til å laga verk som reflekterer rundt temaet. Utstillinga inneheld verk av Per Dybvig, Susanna Kajermo, Kristen Keegan, Imi Maufe, Xueting Yang og ikkje minst kvemmingen Tord Torpe. Torpe er kjend for illustrasjonane, teikneseriane og animasjonsfilmane han har laga. I tillegg illustrerer han kommentarar i Bergens Tidende. I Kabuso skal han ifølgje Lillebostad utfalda seg i eit langt større format.

– Han har mellom anna utfordra seg sjølv til å laga eit stort arbeid direkte på ein vegg. Det er eit verk som er eksklusivt for denne utstillinga. Og sidan det er teikna rett på veggen, forsvinn det når utstillinga forsvinn, fortel Lillebostad.

Torpe skal også stilla ut fleire innramma verk.

– Tord når ut til eit stort publikum med avisteikningane han lagar, men desse er laga på oppdrag frå andre. Her får han visa fram meir personlege verk, seier Lillebostad.

– Stor variasjon

Lillebostad lovar ei variert utstilling. Den vil mellom anna innehalda gigantiske bøker laga av tekstilar og eit kortspel laga spesielt for utstillinga. Dette vert folk oppmoda om å setja seg ned og spela.

Utstillinga vil også ha ein installasjon inspirert av lokale skilt og symbol, medan dei som ønskjer levande teikningar, kan sjå animasjonsfilmar i konsertsalen.

«Handboren og veggfast» skal til og med ha eit eige bibliotek der både bøker laga av kunstnarane som stiller ut og andre vert å finna.

Utstillinga opnar laurdag 7. oktober og skal stå til 30. desember. På opninga kan publikum møta fem av dei seks kunstnarane.

Som ein del av utstillinga inviterer Kabuso til fleire teikneverkstader leia av kunstnarane.