Teiknar med lys i kubbefjøset

Marianne Skjelbred sel bilete i nær sagt heile verda. Og så stiller ho ut på Mundheim.

Ein gong var ho kanskje kven som helst, men den tida er omme for biletkunstnar Marianne Skjelbred. For sakte, men sikkert har ho innsett ikkje berre at ho har eit visst talent for å måla, men at ho endåtil kan ta seg god betaling for verka ho produserer. Ho har mellom anna dekorert ei rekkje skip og bygg.

Eit 30-tal personar – familie, folk frå grannelaget og andre – var til stades då ho opna salsutstillinga i kubbefjøset på Nestunet sundag. Dei fekk oppleva både hagl, ausande regn og sol; alt truleg midt i blinken for ein kunstnar som er særleg glad i lyset.

Prøver å oppmuntra

Skjelbred har arbeidd sidan 2006 som biletkunstnar. Då sa ho opp ei stilling i marknadsavdelinga i Bergens Tidende. I dag har ho eige galleri ved Fløibanen, så sentralt at folk frå alle verdshjørne kjem innom.

Skjelbred kjem opphavleg frå Sandefjord, men flytta til Bergen av di ho er så glad i byen. Dei fyrste åra etter at ho byrja måla, sat det langt inne å krevja pengar for bileta. No sel ho bilete som varmt kveitebrød.

– Draumen min var å oppmuntra Bergen gjennom kunsten. Eg byrja stilla ut i kafear og der folk var. Tilbakemeldingane var at dei som jobba der, kjende glede, fortalde kunstnaren til dei frammøtte i mottingen ved kubbefjøset.

Ho fekk òg høyra at kunsten hennar kunne gje folk i livskriser nytt håp, sjølv om ho fyrst måla mest abstrakte motiv. Sidan gjekk ho over til ein mellomting mellom det konkrete og figurative. Særleg kjend i Noreg er Skjelbred for ymse bergensmotiv.

Kunsten hennar er prega av kjærleik til særleg natur, lys og hav. Ho tek gjerne utgangspunkt i fotografi. Faktisk er fotoiveren så stor at ho stadig må utvida lagringsplassen, fortel ho.

– Foto betyr å teikna med lys. Den tankegangen har eg teke med meg inn i kunsten. Lys gjer oss glade, seier ho.

Uvanleg lokale

Kåre Nes og Anne Karin Laupsa Nes driv Nestunet, som består av ei rekkje bygningar frå ulike epokar. Kåre er den 11. generasjonen i rekkja som driv garden. Attåt landbruket leiger paret ut husrom. Pandemien prega også aktiviteten på Nestunet, men i og med at eigarane ikkje er avhengige av inntektene frå reiselivet, kom dei seg greitt gjennom perioden. Heller ikkje 2022 vert noko toppår, men aktiviteten har vore heilt grei.

Ifylgje Kåre Nes er det sjette gong at Nestunet held kunstutstilling i det såkalla kubbefjøset, som ligg i ei sjeldsynt form for løe bygt opp med kvitkalka trekubbar i staden for murstein som grunnmur.

– Ein spesiell og fin stad å stilla ut, seier Skjelbred.

Heilt ukjend med å pynta bygg i landbruket er ho ikkje. Ho har nemleg tidlegare har fått æra av å dekorera den oppussa løa og selskapslokalet til fiskebåtreiar Inge Halstensen i Austevoll. Han måtte nemleg berre ha verket Austevoll by night.

Utstillinga på Nestunet varar til 18. september.