Vokalensemblet Tabula Rasa, saman med akkordeonisten Jostein Stalheim, skal urframføra det nyskrivne verket «TID» av pianist og komponist Knut Vaage under Bergen Kirkeautunnale 22. september. Same dag vert det framført i Kabuso i Øystese, ifylgje ei pressemelding frå ensemblet.
Verket byggjer vidare på eit samarbeid mellom ensemblet og Vaage som starta i 2021. «TID» kombinerer poesi, bibeltekstar og fakta, og undersøkjer korleis me opplever nettopp tid. Musikken er inspirert av dei gamle grekarane si oppfatning av kronos – den lineære tida– og khairos – djupnetid, ifylgje presseskrivet.
Tabula Rasa er eit profesjonelt vokalensemble frå 2017 med mål om å fremja tidlegmusikk og ny klassisk vokalmusikk. Arild Rohde er musikalsk leiar for dei seks medlemene.
