Synte korger og korgfilm i korgmekka
Silje Ensby frå Vikøy, Hege Iren Aasdal frå Steinstø og Samson Øvstebø frå Husnes vitja i helga ein korgmarknad i den tyske byen Lichtenfels.
Ensby er formidlingsrådgjevar ved Hardanger fartøyvernsenter. Aasdal er korgmakar og Øvstebø kipemakar.
Marknaden i den vesle byen i Bayern hadde 100.000 gjester og er med det Europas største korgmarknad. Byen er korghovudstaden i Tyskland frå gamalt av, med den einaste attverande korgmakarskulen, fortel Ensby.
For 42. gong arrangerte byen ein festival for flettekunst og korgmakeri, med yrande festivalstemning i alle gater. Aasdal fekk æra av å opna arrangementet. Ho var årets hovudutstillar, og har eit stipendiatprosjekt i norske tradisjonskorger hjå Norsk Håndverksinstitutt. Utstillinga skal stå i ein månad, opplyser Ensby.
Korgmakarar frå heile verda var med, så langt unna frå som Japan. 40 boder med kunsthandverkarar frå heile verda stilte ut og selde korger. Alt som kan lagast ved fletting var til sals; korghattar, sekker, stolar og lamper med meir. Festivalen hadde òg ein korgparade med karnevalsstemning og ein korgkarusell, og ei eiga korg-miss med korgtiara.
Arrangementet hadde eit eige kortfilmprogram, med filmar om korgmaking. Ein av desse var filmen «Mjuke røtter». Han handlar om Aasdal og er laga av Ensby. Filmen hadde premiere i same bygg som utstillinga, i eit slott frå 1500-talet. Han er spela inn i Borgstova i Vikøy, og viser prosessen bak ei «vombakorg», fletta i tæger – bjørkerøter.
