– Syng for å dyrka ein glad kvardag

– Å syngja er den tingen i verda eg likar aller best. Eg syng kvar dag, berre fordi eg tykkjer det er så gildt, fortel ho.

– Kvifor likar du så godt å syngja?

– Fordi det er så sjukt lett å treffa seg sjølv og andre rett i kjenslene. Songen hjelper meg til å dyrka ein glad kvardag.

Travle dagar

Ho får rikeleg med høve til å syngja for tida. I helga song ho under Bygdapride. Sundag skal ho syngja saman med Sjøforsvarets Musikkorps under Hardingtonar. Med på konserten vert også fleire lokale korps.

Tilbodet kom frå kulturskulelærar og Hardingtonar-sekretær Arngunn Timenes Bell.

– Eg er ein ja-person, så eg seier berre ja til alt, fortel Furu.

Ho har aldri sunge med korps tidlegare. Då HF møtte henne fredag 31. mai, fortalde ho at den første og einaste øvinga med korpset vert i Bergen på torsdag.

– Heldigvis vert eg ikkje lett nervøs. Eg trur dette kjem til å gå veldig fint. Litt spent er eg, men ikkje nervøs, fortel ho.

Solveig syng mange typar musikk, men styrer unna rapp og syng sjeldan klassisk.

– Eg syng mest popmusikk, og eg syng den gjerne på min eigen litt «jazzy» måte.

Dei siste par åra har ho teke songtimar på Kvam kulturskule. Ifølgje songlærar Nancy Karine Eikeland Sangolt utmerkjer ho seg ved å ha sterke meiningar om korleis songane skal lyda.

– Eg skjønar at ho seier det. Eg er ein ganske bestemt person, seier Furu.

Fekk Facebook-napp

For å skaffa seg songoppdrag, har ho lagt ut Facebook-innlegg der ho tilbyr seg å syngja i bryllaup, konfirmasjonar og liknande arrangement for ein billeg penge.

– Bygdapride var dei første som tok kontakt. Sidan har det kome fleire. Eg skal syngja i fleire bryllaup i sommar, seier ho.

Den syngjande ungjenta skal dessutan ein tur til Bodø for å kjempa om heider og ære i slutten av juni. Ho gjekk vidare frå den lokale UKM-markeringa i Øystese i vinter. Det gav plass i fylkesfinalen på Askøy i april, som igjen gav plass i landsfinalen i Bodø.

Solveig er fødd og oppvaksen i Bergen, men flytta til Ytre Ålvik for snart tre år sidan.

– For eitt år sidan berre bytte eg frå bergensdialekt til kvammadialekt, så no føler eg meg heime her, fortel ho.

Ho er elev på Kvam vidaregåande skule si avdeling i Steinsdalen, der ho går på faget industriteknologi. Planen er å verta sveisar.

Syng mykje, øver lite

Kvardagane omtalar ho som fulle av song. Ho syng inne og ho syng ute. Som regel brukar ho tid kvar einaste dag, heile året, på å stå utanfor bustaden i Ytre Ålvik og berre syngja ut mot fjorden.

– Eg er veldig dårleg til å øva, men eg syng nesten heile tida, til og med når eg sveisar.

– Irriterer det ikkje andre i nærleiken?

– Nei, for eg syng så fint.

– Du vurderer ikkje å gjera songen til ein karriere?

– Nei. Eg dyrkar song for å verta glad. Er ein avhengig av løn, vert songen stress. Eg vil at det å syngja berre skal bidra med gode ting i livet mitt.

– Kva er planane vidare?

– Først har eg tenkt å verta ein veldig god sveisar. Så er planen å verta ein geitebonde som sveisar og syng.