Syner kvammanaturen til bergensarane
Naturen i Kvam går att i måleria Wim van den Toorn for tida stiller ut i Galleri Christinegaard i Bergen.
Utstillinga, som har fått den sjølvforklarande tittelen «Maleriutstilling», inneheld 30 oljemåleri, fortel van den Toorn.
– Motiva er henta frå naturen i nærområdet. Utstillinga inneheld til dømes ein serie med store eiketre som eg måla medan eg budde i Vikøy. I 2022 flytta eg til Tørvikbygd. Der har eg fantastisk panoramautsikt over fjorden. Etter at eg har flytta, har utsikta inspirert mange av måleria mine, fortel han.
– Ein liten milepåle
Galleri Christinegaard vert drive av kunstnarar og ligg i Sandviken.
– Galleriet har vorte veldig populært. Mange av dei mest kjende kunstnarane i Bergen har stilt ut der, fortel van den Toorn.
For han er utstillinga viktig.
– Dette er første gong eg har ei separatutstilling i Bergen. Den er ein liten milepåle, fortel han.
Han har fleire utstillingar på teiknebrettet. Mellom anna vert han årets kunstnar på fredssymposiet til Hardangerakademiet for fred, utvikling og miljø i Jondal.
Meir frå Kvam
Utstillinga i Bergen opna laurdag. På opninga heldt pianist og kvemming Torgeir Kinne Solsvik ein minikonsert. Ifølgje van den Toorn var den særs vellukka.
– Det skjedde noko magisk då musikken møtte måleria mine. Musikken og kunstverka utfylte kvarandre på ein fantastisk måte. Me planlegg fleire samarbeid, seier han.
Utstillinga er open laurdagar og sundagar til 11. februar. Kunstnaren skal sjølv vera til stades i det meste av opningstida.
