Superheltar gav gull til kvemming
Are Valle Skjelvan frå Norheimsund kunne laurdag feira at serien «Superheltskolen» vann Gullruten for beste barne- og ungdomsprogram.
Serien er produsert av Seefood TV AS, der Skjelvan er produsent og regissør, og vert vist på NRK og på kanalar i fleire europeiske land.
Skjelvan fortel at «Superheltskolen» er i sjangeren action/komedie, og handlar om ein skule for born med superkrefter.
– Borna har sterke sider og svake sider. I serien prøver og feilar dei på vegen fram til å verta ekte superheltar. Dette nyttar me til å skapa komiske situasjonar, fortel han.
– Eit hjartebarn
Skjelvan har tittelen serieskapar, og har produsert, regissert og skrive manus til mange av episodane. Det er ikkje første gong han har vore involvert i prosjekt som har vunne Gullruten. Han var med på å laga serien «Amigo», som fekk Gullruten for beste barne- og ungdomsprogram i 2009. Han var òg med på å produsera Gullruten-sendinga i 2014, ei sending som vann prisen for beste event- eller sportssending i 2015.
– I dei prosjekta hadde eg mindre roller. «Superheltskolen» er liksom mitt prosjekt og har vore mitt hjartebarn dei siste åra. Det var større å vinna denne gongen. Det gjer godt å kjenna at nokon set pris på arbeidet ein har gjort. Samstundes er det alltid bra å ha slike prisar på CV-en. Det var rett og slett jækla kjekt å vinna. Å vinna ein pris er noko alle burde få oppleva, seier han.
Video-inspirasjon
«Superheltskolen» er ifølgje Skjelvan inspirert av filmane han leigde på lokale videosenter på 1980- og 90-talet.
– Eg har henta idear frå «E.T.», «Tilbake til fremtiden», «The Goonies» og andre filmar eg såg då eg var ung, fortel han.
Til no har to sesongar av «Superheltskolen» gått på NRK. Ein tredje sesong er ferdig, og vert send neste år.
Skjelvan fortel at han har ein draum om å utvikla serien til ein spelefilm, men for tida er han oppteken med fleire andre prosjekt. Mellom anna er han redaktør for ein ny reiseserie med Anne Lindmo NRK utviklar. Serien har førebels ikkje fått tittel.
