Støttar planane om eit Fosse-senter
– Me er imponerte over det gode formidlingsarbeidet Fosse-Stiftinga utfører, og me meiner at senteret må byggja vidare på dette arbeidet.
Det skriv dagleg leiar Ingvild C. Herzog og nestleiar Sissel Kristensen i Norsk Forfattersentrum i eit innspel til forprosjektet. At Kvam herad og Vestland fylkeskommune går inn som prosjekteigarar saman med Fosse-Stiftinga, vert tolka som eit svært positivt signal, skriv dei.
Norsk Forfattersentrum understrekar at senteret må byggja på unike trekk som knyter forfattarskapen til Jon Fosse til heimstaden hans. Senteret bør tilby eksklusive innblikk i og kunnskap om forfattarskapen, og formidla dette gjennom metodar som ein ikkje møter andre stader.
Blant forslag til aktivitetar ved senteret trekkjer organisasjonen fram litteraturarrangement av høg kvalitet, i tillegg til moglegheitene for å nå eit breiare publikum gjennom digitale tilbod. Senteret må heller tora å definera ein tydeleg nisje eller profil heller enn å gapa over for mykje, står det i innspelet. Vidare vert det føreslege å styrkja senteret sitt samarbeid med ulike fagmiljø, samstundes som ein held på den lokale forankringa.
– Lokal eigarskapskjensle og engasjement er truleg den viktigaste suksessfaktoren saman med ein tydeleg profil og fokus på kvalitet, skriv Herzog og Kristensen.
