– Større enn tenkt
Blant anna «nobelkake» stod på menyen då songar og musikar Sinikka Langeland med band heldt konsert i Fossehuset laurdag.
At Jon Fosse nyleg fekk tildelt nobelprisen i litteratur, kunne knapt ha passa betre for folkemusikaren. Synkroniseringa er nesten ikkje til å tru, seier ho.
Nyleg gav artisten nemleg ut plata «Wind And Sun», der ho har sett musikk til dikt av Fosse.
– Det var jo berre flaks at dette kunne slåast saman med at Jon Fosse vann. Det er berre vanvettig flott! sa Langeland like før konserten.
Les også:
– Magisk
Laurdag kveld spela Langeland og bandet for ein fullsett sal i Fossehuset. Å framføra tolkingane på Fosse er magisk, synest Langeland.
Rekkja med bilar langs vegen var lang allereie ein halvtime før konsertstart. Mellom 80 og 90 personar tok turen i haustvêret for å få med seg konserten. Kanskje freista det også med nobelkake. Ei stor marsipankake stod nemleg klar til publikum etter konserten.
Framsyninga hadde vore planlagd lenge, men Fosse-Stiftinga ynskte å nytta høvet til å markera prisen. Det lyt jo feirast, sa styreleiaren i stiftinga, Åse Ljones.
Les også:
Ikkje lenger «spynorsk»
Før musikarane entra scena, gratulerte Ljones både Fosse, publikum, Kvam herad, fylket, heile Noreg og alle litteraturinteresserte med prisen.
– Dette er mykje større enn me hadde både tenkt og trudd. Det er heilt fantastisk. Me har nok ikkje heilt landa enno, sa Ljones.
– Som Fosse sjølv skreiv – det vert nok eit anna liv etter denne prisen, sa ho.
Randi Jåstad ynskte å gratulera på vegner av Kvam Mållag. Fosse seier han har mykje å takka det nynorske språket for. No takkar dei som prøver å fremja nynorsken han. Han viser korleis nynorsk kan brukast til å skildra alle nyansar i menneskelivet – frå det mørkaste til det lysaste, sa Jåstad.
Nye medlemar
No skriv New York Times og andre aviser i heile verda om Fosse, Strandebarm og nynorsk. Det skjer ikkje så ofte, men det er veldig stas, sa nynorskentusiasten.
– Nett no snakkar ingen om nynorsk som «spynorsk» eller «grautmål» og så vidare, sa Jåstad.
Tvert om. Ho kunne nemleg fortelja at Noregs Mållag hadde fått mange nye medlemar dei siste dagane. Fosse er med på å gjera nynorsken sterkare og brukarane litt rettare i ryggen, avslutta ho.
Også Fosse-kjennar og ordførar Torgeir Næss skulle ha vore på markeringa, men melde avbod.
Les også:
