Storfest for storband

Sjukdom tvinga skodespelaren og songaren frå Øystese til å melda avbod i siste liten til jubileumskonserten til Hardanger Big Band laurdag kveld.

Om fråværet av den mest profilerte gjesteartisten for kvelden var ein nedtur for somme, vart kvelden i Øystesehallen truleg likevel ein opptur for dei om lag tre hundre som sessa seg kring bord i idrettshallen. Vokalist Anette Lerøen Rønhovde og dei vel tjue andre som var med på scena, baud på både svingande tonar og ymse historier frå bandet som vart etablert som Jondal Storband i 1987.

«Drepte oss»

Mellom anna fekk publikummarane vita at dirigent og primus motor Arild B. Nielsen, som i fjor vart tildelt storbandprisen, parkerte seg sjølv som trommeslagar etter at Jens Wendelboe deltok på eit seminar med bandet.

«Han kom og drepte oss», skal Nielsen ha sagt om seminaret. Ifylgje konferansier og NRK-journalist Øyvor Bakke var møtet med Wendelboe inngangen til ei ny tidsrekning for storbandet. Og Nielsen har halde fram med å bidra på eit knippe andre instrument, med trompeten som hovudinstrument og mellom anna luren som krydder. Og laurdag endåtil song han, i form av For you my love, til dei to store kjærleikane i livet: storbandet og kona Astrid.

Wendelboe, ein internasjonalt kjend komponist, arrangør og musikar som har vore orkesterleiar for mellom andre Donna Summer og Shakira og er kjend som domar i Stjernekamp på NRK, meiner utviklinga til storbandet har vore fantastisk og rivande.

– Ikkje minst på grunn av Arild. Han har vore ein utruleg pådrivar, ikkje minst ved å ha idear og dra inn andre. Bandet har fått til ein smeltedigel der ein har klara å få til det me snakka om den gongen. Det læt som det skal lyda i eit storband, sa han på konserten.

Musikalsk venskap

Wendelboe har tidlegare stått bak fleire arrangement for HBB. Wendelboe fortel til HF at det fyrst og fremst er venskapen med Nielsen som har skapa ei spesiell kopling til storbandet. I tillegg har Angunn Handegard Trå sytt for at ting har vore på stell når partane har samarbeidd, noko som har mykje å seia når tida er knapp, fortel han til HF.

Wendelboe bur hjå Nielsen i Jondal, og vart med på eit seminar for trombonistar når han fyrst var i regionen. Tysdag reiser han vidare til nye oppdrag i Noreg, før han skal returnera til USA. Når han fyrst kryssar Atlanterhavet, slår han helst fleire fluger i ein smekk. Interessa for å nytta seg av tenestene hans viser seg nemleg å vera stor.

Dei som var på konserten, kunne konstatera at han var nesten utan røyst – og stort betre var ho ikkje då HF snakka med han to dagar seinare. Ein kombinasjon av råare luft, jetlag og dårleg søvn ligg bak, fortel han. Men å spela trombone – det klarar han uavhengig av røysta.

– Det var skikkeleg morosamt. Det tok heilt av på slutten, seier han etter jubileumskonserten.

Verdspremiere

Wendelboe hadde komponert og arrangert tingingsverket Hardanger Big Band –Occurence, som vart framført laurdag. Han fortel at han freista leggja lista på den rette staden, slik at storbandet meistra det meste, men samstundes måtte tøya strikken litt.

– Eg trur eg trefte bra, seier han.

Elles stod gitarist Gisle Torvik, songar Nina Jori Pedersen og songar Anne Cathrine Eiken på scena saman med jubilanten, som har ei overvekt av kvemmingar og jondølingar i rekkjene.

Me gjer merksam på at HF var til stades i berre den fyrste halvdelen av den kring lag tre timar lange festkonserten.